Kommune Kujalleq ataqatigiissaakkamik Kommunip Allaffissaanik Kulturimullu Illorsuarmik pileraarusiuleruttorpoq.
2018-imi novembarip qaammataani Qaqortumi ataqatigiissaakkamik Kommunip Allaffissaata Kulturimullu Illorsuassaata nutaap pilersaarusiornissaanut kommunalbestyrelse aningaasaliivoq.
Ukiuni kingullerni Qaqortumi kommunip allaffia ilaatigut oqummik ajornartorsiuteqartarsimavoq. Naak ajornartorsiut arlaleriarlugu iliuuseqarfiginiarneqartaraluartoq paasinarsisimavoq maannakkut kommunip allaffia ingutseriarlugu nutaamik sanaartornissaaq tulluartuunerussasoq.
Tamanna peqqutigalugu illuliassanik titartaasarfik sanaartornermillu siunneruisarfik Masanti suleqatigalugu Kommune Kujalliup kommunimi ingerlatsiviit pisariaqartitaat kiisalu Kulturikkut Illorsuaq qanoq ilillugu pilersaarusiamut ilanngunneqarsinnaanersoq maannakkut misissuleruttorpai. Naatsorsuutigineqarpoq pisariaqartitat allaatigineqarneri taakku 2020-p naalernerani naammassineqarumaartut, tamatumalu kingorna innuttaasut soqutigisaqaqatigiillu peqataatinneqarnerisa saniatigut sanaartornissamut pilersaarusiaq kiisalu sanaartornissamik pilersaarummik ajornanngippallu illuliassanik titartaasartunut unammisitsinissamik suliaqartoqassasoq.
Nutaamik kommunip allaffissaanik pisaarnikkut ingerlatsiviit ataatsimuulersinneqarsinnaanngussapput, maannakkummi kommunip ingerlatsivii sisamat illoqarfimmi illuni assigiinngitsuni sisamani inissisimammata.
Borgmesteri Kiista P. Isaksen oqaaseqarpoq:
" Qaqortumi nutaamik Kommunip Allaffissaanik pilersaarusiornermut atatillugu innuttaasut pigisaattut nalilittut isigineqarnissaa pingaartissimavarput, tassaassanngimmammi illorsuaq ullormut nalunaaquttap akunnerini arfineq-pingasuni taamaallaat atorneqartartussaq. Taamaammat illorsuarmi Kommunip Allaffianut ilaatillugu aamma Kulturikkut Illorsuarmik inissaqartitsinissaq anguniarsimavarput, taamaalilluni ullaarnganit unnuk tikillugu illorsuarmi pisoqartarniassammat".
Ukioq 2020-p qiteqqunnissaata tungaanut nunatsinni ataqatigiissaakkamik Kommunip Allaffianik Kulturikkullu Illorsuarmik siullerpaajusussamik pilersaarusiornerup ingerlanneqarneranut atatillugu innuttaasut soqutigisaqaqatigiillu ilaatinneqassapput.
Borgmesteri Kiista P. Isaksen nangilluni oqaaseqarpoq:
2020-p ingerlanerani ataqatigiissaakkamik Kommunip Allaffissaanik Kulturikkullu Illorsuassamik kommunip pilersaarutaata saqqummiunneqarnissaa innuttaasunillu, peqatigiiffinnik, suleqatigiinnik tapersersuisunik soqutigisaqaqatigiinnillu allanik oqaloqateqaqqinnissaq assut qilanaaraarput, soorluttaaq sulisutta ullutsinnut tulluartunik periarfissagissaartillugit neqerooruteqarfiginissaannut qilanaartugut.
Kommunip Allaffissaata aamma Kulturikkut Illorsuup nutaap atuutilernissaa 2023-p naalernerani/2024-p aallartinnerani pissaasoq naatsorsuutigineqarpoq.
Annerusumik paasisaqarusukkuit borgmesteri Kiista P. Isaksen attavigiuk, oqarasuaat 49 76 72.