(Borgmesterip innuuttaasunut nalunarutaa Naalakkersuisut 17/3 nal.15.00 tusagassiortunik katersortitsinnerat sioqqullugu allataavoq.)
Nalaakkersuisoqarfimmi ataatsimiititaliarsuullu sulinerani pisut nunatsinni kommunit ataatsimoorluta qanimut malinnaaffigalugit ulappuppugut.
Ajuusaarpunga manna sioqqullugu innuttaasunut nassuiaateqarsimannginnerput, Kommunit suleqatigiilluta assigiinngitsutigut aaliangiisimanigut sulisunut innuttaasunullu aamma paatsungatitsilersimassappata.
Innuutaasunut kaammattuutigisimavarput kommunip allaffiinnut ornigulluni saaffiginninnani oqarasuaatit e-maililu atorlugit saaffiginnittarnissaq pisassasoq, taamaliorpugut nualluutip tuniluutinnginnissaa sullissiinnarnissarlu anguniarlugit.
Sulisummi ilaat napparsimalissagaluarpat sulisut amerlanerpaat angerlatinneqartussaapput, taamaattoqassappallu sullissineq kipiluttunartumik ingerlalertussaasalluni, tamannalu pinngitsoortikkusoqaarparput. Sulisummi pinngitsoorsinnaanngilagut, soorlu pisortatigut ikiorsiissutit suliarineqarnissaannik, pensionit suliarinissaannut allarpassuarnullu, inuiaqatigiinni pingaarutilinnut.
Taamaattummik tamatta akisussaaqataanermik tigusisariaqarpugut, COVID-19 pillugu upalungaarsimanissatsinnut innersuussutit malittariaqarpagut, inuiaqatigiit illersoqatigiilluta.
Inuiaqatigiinni pingaaruteqarlutik sullissisut soolu napparsimavinni sulisut, utoqqartatsinnut sullissisut, innarluutilinnik sullissisut, allatulluunniit pingaaruteqartunik sulisut pinngitsoorsinnaanngisagut sapinngisamik nappaammik eqqorneqannginnissaat kissaatiginaqimmat tamatta susassareqatigiinnerput akisussaaqatigiinnerpullu takutillugu paarisariaqarpugut.
Ullunilu makkunani meeqqat atuarfiisa aammalu meeqqeriviit matuneqarnissaanik oqariartuuteqartut paasilluarsinnaavakka, matumani oqariartuut inuiaqatigiit immitsinnut paarinissatsinnik oqariartuuteqarmat.
Upalungaarsimaneq eqqarsaatigalugu atuarfinni meeqqerivimmilu iliuusissanik suliaqartoqareerpoq. Meeqqat amerlavallaat ataatsimuunnginnissaat piniarlugu malitassaliortoqarsimavoq, ilaatigut atuartut atuariartortarfiinik nikisiterinikkut, anitsiartarnerillu allanngortiternerisigut.
Ullumikkut killiffik aallaavigalugu iliuusigut toqqarsimavagut, suliffeqarfippassuarni innuttaasunik kiffartuussineq unittoortikkusunnginnatsigu. Siusippallaartumimmi matusigutta meerarpassuit paarsisussaqanngitsut angajoqqaavisa angerlarsimaqatigisariaqassammatigit.
Pisuni assigiingitsuni aaliangeeqataasussaalluni akisussaaffeqarluni inissisimagaanni, sunilluunniit annertuunik aaliangiinginnermi eqqarsarluaqqaarnissaq pisariaqartarpoq.
Taamaattumik atuarfiit meeqqeriviillu matussagaluarpata inuiaqatigiinni pinngitsoorsinnaanngisatsinnik sullissisut meerartaasa aamma paarsissussaqarnissaat qulaakkeertariaqarparput. Aaliangiinissami matumani meeqqat Kommune Kujallermi 1166-inik amerlanerusut pineqarput, taakkulu ilaqutai pinngitsuungivilluta kalluartussaallugit.
Erseqqissarusuppara matumani aningaasaq peqqinnissamik salliutinneqanngimmat, inuiaqatigiinnili sullissiinnarnissap unittoortoqannginnissaalu eqqarsaatigineqarmata.
Erseqqissaatigissavara pisut qanimut malinnaavigeqqissaarneqarmata, pisariaqalissappallu matusisariaqalernissarput allaqqussinnaajunnaassavarput.
Taamaattumik ullumikkut kiffitsinni aaliangiussagut tamanik isumaqataaffigineqanngikkaluartut naammagittalaartariaqarnissarput inussiarnersumik kaammattuutigissavara.
Inissisimaffimmi matumani tamaavitta ernumavugut, taamaattumik kamak atornagu paaseqatigiilluta paasinnillutalu ingerlaqqittariaqarpugut, pingaraaruteqarporli aamma uippallernaveersaarnissarput.
Aatsaammi taama inuiaqatigiittut ataatsimoornissarput pingaaruteqartigivoq, tamattami paarisariaqarpugut.
Eqqaamalluguli ullugut nuannersunik immersortarnissaat puiussannginnatsigu, nuannersunimmi immersuinitsigut immitsinnut paarinissatsinnut nukissanik pissarsiffigissagatsigut.
Periarfissaq iluatsillugu, upalungaarsimanissamut suleqataasorpassuit qujaffigaakka, sulimi suliassat imaanaanngitsut aamma suliassaraagut, qularinngilarali inuiaqatigiit pillugit ataatsimoorfeqarluarluta suli suleqatigiilluarumaartugut.
Asannittumik
Kiista P. Isaksen
Kommune Kujallermi borgmesteri