Kommune Kujallermi sulisut ukiuni marlunni sulereersimasut peqqinnissamut sillimmammik januaarip aallaqqaataaniit atuisinnaanngorput, tamannalu sulisut peqqinnissaat eqqarsaatigalugu periarfissiilluassaaq.
-Nuannaarutigeqaara sulisutsinnut taama neqerooruteqarsinnaanngornerput, sulisuttami pitsaanerpaamik atugaqarnissaat pingaarteqarput. Matumanimi sillimasiinerput peqqinnissaq eqqarsaatigalugu sulisutsinnut periarfissilluassaaq, borgmester Kiista P. Isaksen oqarpoq.
Kommune Kujallermi sulisunut ukiuni marlunni sulereersimasunut peqqinnissamut sillimmat neqeroorutaasoq, nakorsamit misissortinnermiit suliaritinnernut assigiinngitsunut matussusiisinnaavoq. Assersuutigalugu seeqquleritinnermi, ilukkut suliaritinnermi (underlivsoperation), neqertaajartinnermi, ujarattanissimalluni ujarataajartinnermi assingusumilluunniit suliaritinnissamut atorsinnaavoq.
-Peqqinnissamut sillimmat suliffeqarfitsinni nutaarluinnaavoq, taamaakkaluartorli ilisimavarput arlaatigut suliaritinniarluni sivisuumik utaqqisitaasinnaasarneq nunatsinni takornartaanngitsoq. Taamaattumik Kujallermi sulisutta sillimaserneqarnermikkut peqqinnissaq eqqarsaatigalugu periarfissagissaarnerulernerat pitsaasuuvoq, Kiista P. Isaksen oqarpoq.
Peqqinnissamut sillimmat aamma oqarasuaatikkut nakorsiarfimmik neqeroorutitaqarpoq, taamaalilluni sulisut peqqinnissamut sillimammik atuisut pisariaqartitsiffimminni oqarasuaatikkut sullinneqarsinnaapput.