Sapaatip akunnerata siuliani Kommune Kujallermi upalungaarsimanermut pisortassamik toqqaasoqarnerani Qaqortumi qatserisartut arfineq marluk tunuarlutik nalunaaruteqarput, matumani Kommune kujallermi upalungaarsimanermut pisortanngortikkusutaraluamik toqqagaannginnera tunuassutigalugu.
-Taamatut pisortassamik toqqaasoqarnerani isumaqataannginneq tunngavigalugu tunuartoqarnera uggornarpoq, upalungaarsimanermimmi suliaqassagaanni innuttaasut sullinnissaat pingaarnerpaavoq, tunuartoqaraluartorlu Qaqortumi upalungaarsimaneq ernumananngilaq qatserisartut naammattut piareeqqammata, Peter Mathiassen Kommune Kujallermi upalungaarsimanermut pisortaagallartoq oqarpoq.
Qatserisartut tunuartut pisortanngortikkusutaraluartik pisortanngortinneqanngimmat tunuarnertik tusagassiutitigut nalunaarutigaat. Tamatuma kingorna upalungaarsimanermut pisortassatut toqqarneqaraluartoq tunuarluni nalunaaruteqarpoq.
- Upalungaarsimanermut pisortassatut neqeroorfigineqartup tunuarnera uggornarpoq, maannalu qanoq ingerlariaqqittoqarnissaa Teknikkimut Avatangiisinullu Ataatsimiititaliap aalajangiiffigissavaa, matumanilu erseqqissaassutigeqqikkusuppara Qaqortumi upalungaarsimaneq ernumananngitsoq, soorlu tamanna Upalungaarsimanermut Ataatsimiititaliarsuup ataatsimeeqatiginerani naqissuserneqartoq, Peter Mathiassen naggasiivoq.