Katsorsaasut marluk septembarip qulingiluaanni Aappilattumut tikissapput, matumanilu innuttaasunit piumasunit oqaloqatigineqarsinnaassallutik.
-Nuannaarutigaara Allorfillu suleqatigiilluta Aappilattumut tikisitsisussassanngornerput, innuttaasunummi atorfissaqartitsisunut oqaloqatiginninnissamut neqeroorutitsialaavoq, neriuppungalu atorluarneqarumaartoq, Helga Nielsen Kommune Kujallermi Pitsaaliuinermi immikkoortortaqarfimmi pisortaq oqarpoq.
Allorfik tassaavoq pinngitsuuisinnaajunnaarnermik paasisimasaqarfik. Imigassamik, hashimik, aningaasanoornermillunniit ajornartorsiuteqaraanni Allorfimmi katsorsartittoqarsinnaavoq.
-Katsorsaasut Allorfik pillugu Aappilattumi innuttaasunut saqqummiussissapput, matumani katsorsartikkusuttoqarpat paasissutissanik aamma saqqummiissallutik. Najugarisaq qimannagu katsorsaasoqassappat eqimattaq minnerpaamik inunnik 12-nik peqataaffigineqassaaq, tamanna Aappilattormiunit soqutigineqassappat kaammattuutigerusuppara kaammattoqatigiilluni ingerlatsinikkut eqimattaliortoqarsinnaanera, Helga Nielsen naggasiivoq.
Septembarip qulingiluaanni nalunaaqutaq 12.00-miit illu sullivimmi piumasunut katsorsaasunik oqaloqateqartoqarsinnavoq, unukkullu nal. 19.00 Allorfik innuttaasunut saqqummiissaaq.