Qaqortumi pinaveersartitsinermik ataatsimiititaliap septembarip qaammataani ataatsimiinnermini aaliangiuppaa Qaqortumi meeqqanut inuusuttuaqqanullu nakkutiginnittussanik oqaloqatiginnittartussanillu unnukkut pigaartartunik pilersitsisoqarnissaa.
Pilersitiniarnermi meeqqat 13-it ataallugit ukiullit unnukkut kingusinnerpaamik arfineq pingasunut angerlareertarnissaat, inuusuttuaqqallu 13-iniit 16-illu akornanni ukiullit kingusinnerpaamik nalunaaqutaq qulinut angerlareersimasarnissaat ataatsimiititaliap kaammattuutigivaa.
-Taama kaammattuinitsinnut aallaavigaarput inuusuttut 18-it inorlugit ukiullit imigassamik aangajaarniutinillu atuisarnerannik pinaveersaartitsiniarnerput, taamatullu inuusuttuaqqat akornanni imminut toqunnissamik eqqarsaateqartoqartarnera eqqumaffiginiarlugu unnukkut angalasoqartalernissaanik aallartitsinialerpugut, Kommune Kujallermi Pitsaaliunermi immikkoortortaqarfimmi pisortaq Helga Nielsen ataatsimiititaliaq sinnerlugu nassuiaateqarpoq.
Meeqqat 13-it ataallugit ukiullit arfineq pingasut kingorna silami aneertut aamma inuusuttuaqqat 13-it 16-illu akornanni ukiullit qulit kingorna aneertut naapinneqarnerminni qanimut oqaloqatigineqarlutik paasiniaavigineqartarnissaat siunertaavoq.
-Pinaaveersaartitsinermik suliaqarnitsinni matumani unnukkut angalasartussanik suleqatissarsiorpugut, namminerlu kajummissutsiminnik suleqataarusuttut Qaqortumi pitsaaliuinermi immikkoortortaqarfimmut uannut saaffiginnissinnaapput, neriuppunga saaffiginnittoqarluarumaarpoq, ikioqatigiillutami meerartagut paarigutsigit siusinaartumik iliuuseqarnikkut pinaveersaartitsineq annertuumik peqataaffigissavarput, Helga Nielsen oqarpoq.