Kommune Kujalleq, Paarisa aamma ThinkInuk suleqatigiinneranni ilisimasat saqqummiunneqartussanngorput. Matumani ilisimasat pingaaruteqarluinnartut nakorsap Poul Lundgaardip aamma perorsaasup Louise Lundgaardip Igalikumeersut oqalugiarlutik innuttaasunut saqqummiutissavaat.
-ThinkInuk-miit saqqummiussisussat oqalugiarneranni tusarnaarneqarsinnassaaq eqqarsaatit sooq inuunermut navianartorsiortitsisinnaanersut, aamma sooq imminut toqunnermik, persuttaanermik, pimmatiginninnermik aamma atornerluisuunermik kinguneqarsinnaaneri. Saqqummiussisussat ilisimasaat tamanut tusartikkusunnaqimmata innuttaasut soqutiginnittut peqataanissaannut kaammattorusuppakka, Kommune Kujallermi Pitsaaliuinermi immikkoortortaqarfimmi pisortaq, Helga Nielsen oqarpoq.
Oqalugiarnissaq tamanut ammavoq, peqataasullu tamarmik atuagaq ThinkInuk pissarsiarissavaat.
Saqqummiineq siulleq septembarip 21-ani Qaqortup katersortarfiani nal.19.00 ingerlanneqassaaq, taamatullu Nanortalimmi 22 septembari Narsamilu 23 septembari nal.19.00 katersortarfimmi ingerlanneqassalluni.
ThinkInuk pillugu uani annertunerusumik atuarsinnaavutit: www.thinkinuk.com