Akuersissut ukiuni 30-ni atuuttussaq Aatsitassanut Naalakkersuisumit Jens Frederik Nielsenimit, Tanbreezip siulersuisuini siulittaasuanit Bolette Maqe Nielsenimit, Kommune Kujallermilu Inuussutissarsiornermut Suliffeqarnermullu Ataatsimiititaliap siulittaasuanit Simon Simonsenimit atsiorneqartoq Kommune Kujallermi isumalluarfigineqarpoq.
-Atsioqatigiinneq nuannaarutissaavoq, Tanbreezimmi aatsitassarsiorfissamini aallartinissaanut suliniut qanilliallaqqipparput. Suliniut iluatseriarpat nunaqavissunut suliffissarpassuarnik pilersitsiviusussaavoq, tamanna kommunitta aningaasaqarneranut iluaqusiissaaq, aningaasanimmi kaaviaartitsinerulerneq nammineerluta pilersitsinerusinnaanitsinnik nassataqartussaammat isumalluarfigivara, Kommune Kujallermi Inuussutissarsiornermut Suliffeqarnermullu Ataatsimiititaliap siulittaasua Simon Simonsen oqarpoq.
Aatsitassarsiutileqatigiiffiup Tanbreezip Killavaat Alannguanni aatsitassanik piiaanissamut matusinissamullu pilersaarutit amigaatigiinnalerpai. Tamanna iluatseriarpat aatsitassarsiornissaq aallartissinnaanngussammat Kommune Kujallermi borgmeste Kiista P. Isaksenip suliap iluatsilluarnissaanut qilanaaruteqarpoq.
-Kiisami Tanbreezip piaanissamut akuerineqarnera atsioqatigiissutaavoq. Tamanna Kommune Kujallermi innuttaasut amerliartoqqilersimasut suli amerliartoqqilernissaannik nassataqartussaammat suliniutip iluatsilluarnissaa neriuutigeqaara, qilanaaralugulu.
Taamaattumik aatsitassarsiorfik Tanbreez sullissinernik piginnaasanillu sunik kommunitsinni pissarsiarineqarsinnaasunik pisariaqartitsinersoq nalunaarsorlugu aallartereerpugut, tamannalu suleqatigiinnissamik isumaqatigiissumi tunngaviussaaq, borgmester Kiista P. Isaksen oqarpoq.
Aatsitassarsiorfiup Tanbreezip aatsitassanik piianissamut matusinissamullu pilersaarusiaa akuersissutigineqariarpat aatsitassarsiorneq aallartissinnaanngussaaq. Aatsitassarsiornissalli aallartinnginnerani Killavaat Alannguata ataani kangerlummi umiarsuaviliortoqaqqaarnissaa ujaqqanillu sequtserivissamik sanaartortoqarnissaa pilersaarutaavoq.