Najugarisaq qimannagu perorsaasunngorniat ilinniarfianni ilinniartut ukiut pingasut matuma siorna aallartittut ilinniakkaminnik naammassinnillutik juunip pingajuanni allagartartaarput.
Allagartartaartut ilinniarnermik aallartinnerani 20-ullutik aallartissimapput, taakkunannga ataaseq Nuummi ilinniarnerminik ingerlatsisussanngorluni nuussimavoq. Ilnniartut tamarmiullutik naammassinninnerat borgmester Stine Egedep nuannaarutigaa.
-Ilinniakkassinnik unititsisortaqarasi ingerlalluarsimanersi suliassinnut qanoq tunniusimatiginissinnik ersersitsivoq. Ilinniakkassinni ilisimalersimasasi aallaavigalugit isit meeqqanut immikkut ikorfartorneqarnissamik pisariaqartitsisunut takunnissinnaasut pigilersimasasi, kommunitsinni isumaginninnermi sulinikkut pitsanngorsaanissamut kivitseqataassapput. Matumani meeqqat atualinnginnerini ikorfartorneqarnissamik pisariaqartitsisut aamma aqqutissiuunneqartarnissaat suleqataaffigissagissi qularinngilara, Stine Egede allagartartaartunut oqalugiaammini ilaatigut taama oqariartuuteqarpoq.
Perorsaasunngortut sisamanngornermi Hotel Qaqortumi allagartartaartut Kommune Kujallermi atorfissaqartinneqarluarput.
- Siunissaq aggersoq eqqarsaatigalugu kommunitsinni meeqqat atuarfiini tamani perorsaasunik atorfinititsinissaq kommunalbestyrelsimi suliniutitta ilagaat. Atorfissaqartinneqaqaasi, meeqqanik sullissinissinni akisussaafferujussuarmik peqarpusi, taamaammat ullumi angusassinnik tulluusimaarutissaqarpusi, Stine Egede oqalugiarnermini ilaatigut taama oqarpoq.