Nuannaarutigaara Qaqortumi mittarfiliornissaq pillugu inatsisartut aalajangigaata piviusunngornissaanut Naalakkersuisut oqariartuutaat Kommune Kujallermi kommunalbestyrelsimit tiguneqarmat. Naalakkersuisuusimasut aningaasanik immikkoortitsisimannginnerat soorunami kommunalbestyrelsimi ajuusaarutigaarput, immikkoortitsisimasuuppatami mittarfimmik 1500 meterinik takissusilimmut aningaasat qulakkeerneqarsimasuuppata tamanna ajornannginnerusimassagaluarpoq. Kommunalbestyrelsimiilli neriuutigaarput mittarfik 1500 meterinik takissuseqartoq suli piviusunngorsinnaasoq.
Mittarfissaq assigiinngitsunik takissusilerlugu inuiaqatigiit aningaasaqarnerannut nalilersuisimanerup takutippaa piffissaq qaninnerusoq ungasinnerusorlu eqqarsaatigalugu 1199 meteriunissaa imminut akilersinnaanerusoq kommunalbestyrelsip tusaatissatut tiguaa. Kingusinnerusukkullu tallinissaanut inissaqartoq.
Kommunimi mittarfissap takissusissaa sukumiisumik oqallisigineqareerpoq, soorluttaaq Narsarsuarmi innuttaasut Narsarsuup siunissaa ernummatigalugu oqaatigisimagaat. Taamaattorli Naalakkersuisut misissueqqissaarnerisa takutippaat Qaqortup mittarfissaata 1199 meteriunissaa inuiaqatigiinnut kommunimullu pitsaanerpaassasoq. Narsarsuup siunissaata aaqqiiffigineqarnissaa ilungersorluta sulissutigissavarput. Suliap Naalakkersuisuni uninngatinneqarsimanera sivisuallaarsimavoq.
Kommune Kujallermi siunissaq qaammariartorpoq. Nunap immikkoortuani inuussutissarsiornikkut attaveqarnikkullu kommunip tamarmiulluni ataatsimoorussamik pilersaarusiornissaa pingaaruteqarpoq. Siunissami ingerlatsinissaq pitsaanerpaaq qulakkeerniarlugu Naalakkersuisut kommunimilu soqutigisaqaqatigiit qanimut oqaloqatigisarniarpakka.
Stine Egede, borgmesteri.