Qaqortumi Kommune Kujallermi pitsaaliuinermut immikkoortortaqarfik pitsaaliuinermullu ataatsimiititaliaq suleqatigiillutik unnuarissat Tulukkat Sungaartit siorna pilersippaat, taakku illoqarfimmi angalaassagaanngamik ikinnerpaamik pingasuullutik aneersinnaasassasut aaliangernikuusut maanna ikinnerpaammik marluinnaallutik angalasalernissartik pilersaarutigaat.
- Unnuarissani Tulukkat Sungaartini ilaasortap ilaata siunnersuutigaa ikinnerpaamik inuit marluk aneersinnaasarnissaat, taakkumi pisuttuarlutik angalaniaraangamik ilaani ilassaarussinnaasarput taamaammat angalasussani inuit ilaanni marluugunik pingasuugunilluuniit ajornartortaqassanngitsoq isumaqarpunga, taama oqarpoq Pitsaaliuinermik Immikkoortortaqarfimmi pisortaq Helga Nielsen.
Tulukkat Sungaartit aasaanerani angalanngereerlutik, tallimanngornermi septembarip ulluisa 17-anni 18-annilu nalunaaqutaq 19:00 Qaqortumi angalanissartik pilersaarutigaat. Taakku naapissapput pitsaaliuinermi immikkoortortaqarfiup allaffiani Havnevej b 785-imi, kikkulluunniit soqutiginnittut tikilluaqqusaapput.