Nanortalimmi utoqqaat illuat 21-nik utoqqarnik najugaqarfigineqartoq sulisunik qaammammusiaqartunik atorfilinnik 15-inik atorfilittaqarpoq. Akunnermusialinnik 18-inik sulisoqarluni, atorfiillu taakku tamakkerlugit inuttaqarmata sulisunik amigaateqanngillat.
Isumaginninnermut Ingerlatsivimmi pisortap utoqqaat najugaqartut sullissisussaqarmata nuannaarutigaa.
-Nanortalimmi utoqqaat illuanni sulisut naammattut sulisinnaammata assut nuannaarutigaara, taamaalilluni utoqqaat najugaqartut aamma utoqqarnut najugaqartunut ilaqutaasut toqqissisimaqataasinnaapput, Nielsine Petersen oqarpoq.
Nanortalimmi utoqqaat illuat 2019-mi Peqqissutimut Naalakkersuisoqarfimmiit suliffeqarfittut eqeersimaartutut akissarsitinneqarpoq, matumani sulisut najugaqartullu timiminnik aalatitsinerunissaannik suliniuteqartoqarluarnera tunngavigalugu.