Qaqortumeersoq 40-nik ukiulik Sem Ottosen ullumikkut Kommune Kujallermi ingerlatsinermut, nunaqarfinnullu aqutsisoqarfimmi pisortaasoq decembarip aallaqqaataani Teknikkimut Avatangiisinullu Ingerlatsivimmi pisortatut atorfinittussanngorpoq. Borgmesterilu Ingerlatsivik inuttalertussanngornera nuannaarutigaa.
-Nuannaarutigaara pisortamik atorfinitsitsisoqarmat, maannami sivitsortumik atorfik taanna taartaasumit ingerlanneqarpoq. Sulisut annertuunik suliassaqartuarmata ingerlarsorsimaqimmata suleqatigilluarsinnaassaminnik pisortaqalissammata nuannaarutigaara, Kommune Kujallermi Borgmester Stine Egede oqarpoq.
Sem Ottosen qarmaasutut byggeteknikeritullu danmarkimi ilinniagaqarpoq, danmarkimilu qarmaasutut sulilluni misilittagaqareerluni Nanortalimmi ingerlatsinermut pisortatut sulisimavoq, ullumikkullu ukiuni marlunni ingerlatsinermut nunaqarfinnullu aqutsisoqarfimmi pisortatut atorfeqarluni.