Asasakka Kommune Kujallermi innuttaaqatikka
Sapaatip akunnera kommunitsinnut juulliliartunik tikittoorfiusussaq nallerparput, amerlanerillu juullimi ukiutoqqamilu pulaartoqarnissartik pilersaarusioruttorpaat.
Siunnersorusuppassi: Pulaarnerit killillersimaartissigit!
Kommunitsinni tuniluunneq sivisuumik pinngitsoortinnikuuarput. Mianersorsimavugut sulilu taamaattariaqarluta. Nunatsinni illoqarfiit ilaanni tuniluunnerup qanoq annertutigisumik peqqinnissaqarfimmut inuiaqatigiinnullu allatigut sunniuteqapilunnera takusimavarput takorloorsinnaavarpullu nalliuttuni qanoq sukkatigisumik tuniluuttoqarsinnaanera.
Corona ilaat nutaaq Omikron nalunngeriikkatsinnut sanilliullugu sukkanerujussuarmik tuniluuttarpoq, juullimilu angalasut siornamut naleqqiullugu tunillatsissimanissaat ilimanaateqarnerujussuulluni.
Taamaattumik oqariartuut ersarissoq oqaatigissavara: Oqartussat innersuussaat ataqqisigit nalliuttunilu amerlasuukkaarnaveersaaritsi.
Juullimi pilluaritsi