Tasersuup Atuarfiani 3. klassini klassit pingasuusut marluinnanngortinneqarput, 8. klassinilu klassit pingasut aamma marluinnanngortinneqarlutik. Atuartut ilinniartitsisumik ilinniarsimasumiit atuartinneqartarnissaat siunertaasoq atuarfiup pisortaata oqaatigaa.
- Klassit kattunneranni ilinniartitsisut tassaniinnikut klassini ilinniartitsisoqarfiunngitsunut inissinneqarput. Atuartut ilinniartitsisumik ilinniarsimasumik atuartinneqarnissaat tamatumani siunertaavoq, Tasersuup Atuarfiani pisortaq Bettina Abelsen Hansen oqarpoq.
Ukiup aallartinnerani klassimi ataatsimi atuartoqassuseq 26-imut killeqarpoq, kattunnermilu 8. klassini atuartut klassip aappai 17-iulerput aappaallu 18-iulerlutik. 3. klassini klassit marluk tamarmik 22-nik atuartoqalerput.
Ilinniartitsisussaaleqineq peqqutaalluni klassit ilai kattunneqartariaqarput, tamannalu atuarfik tamaat eqqarsaatigalugu atuartinneqarneq pitsaanerusoq anguniarneqarluni. Taammatullu kattunneq meeqqanut sungiunniagassaassasoq pisortap oqaatigaa.
- Soorunami klassit kattunneri ajuusaarnaraluarpoq, tassami atuaqatit sungiusimasat allanngorput tamanna atuartunit aalassassutaalaaraluartoq sungiussinissaat qularnanngilaq, Bettina Abelsen Hansen oqarpoq.
Decembarip aallaqqaataani Tasersuup atuarfiani 3.klassini 8. klassinilu klassit marlunnut kattunneqarput.