Qaqortumi ikuallaavimmi eqqakkanik sequtserut aamma pujumik saligutaasoq siorna septemberip qaammataani ajoquteqalermata ikuallaaneq unitsinneqarpoq, qaammatillu sisamangajaat uninngareerluni maanna ingerlaqqissinnaalerpoq.
-Ikuallaavimmimmi ajoqutaasut maanna aaqqinneqarsimalerput, taamaalilluni eqqakkanik ikuallaaneq pisarnertut ingerlaqqissiinnaalerpoq. Qaammatialuit uninngareernerup kingorna ikuallaaviup ingerlaqqilertussanngornera nuannaarutissaavoq, ikuallaaviummi qaminnganganerani eqqakkat katersorneqarsimasut maanna suliarineqarsinnaalerput, Teknikkimut avatangiisinullu ingerlatsivimmi pisortaq Sem Ottosen oqarpoq.
Ikuallaavimmi ajoqutaasut suliarineqareersullu ikuallaaneq januarip naalernerani aallarteqqippoq, ullunili marlunni ikumatinneqareersorlu sulisut covid-19-mik eqqugaapput.
-Ikuallaavik ulluni marlunni ikumatinneqareersorlu nualluutip tuniluuttup sulisut amerlanersaat eqqorpai, taamaalillunilu isumannaallisaanermik aallaaveqartumik ikullaavik ikumatikkunnaartariaqarsimavarput. Ikuallaavimmi ikumatinneqassappat sulisut misilittagaqarluartut nakkutilliisariaqarput, kukkuluttortoqarneranimi annertuumik ajutoornersuaqarsinnaavoq. Taamaattumik ikuallaaviup ikeqqinnissaanut sulisut misilittagaqarluartut peqqissinissaat utaqqisariaqassavarput, qaminnganeranili eqqakkanik sequterineq ingerlatiinnassavarput, Sem Ottosen nassuiaavoq.