-Qaqortumi mittarfiup upernaaru sananeqalernissaanik isumaqatigiissusiortoqarsimanera pillugu nalunaarut nuannaangaarluta qilanaangaarlutalu Kommune Kujallermi tusarparput, Borgmester Stine Egede oqarpoq.
Qaqortumi mittarfissaq ukiorpassuarni oqallissaasarsimasoq kiisami piviusunngoraluttualerpoq.
-Ukiut 30-it utaqqereerluta, sivisuumik angalasariaqartarluta, pingaartumik napparsimasut, innarluutillit, utoqqaallu pisarioqisumik angalasariaqartareersut, inuussutissarsiortut takornariallu pitsaanngitsumik atugaqareersut, ukiut pingasut qaangiuppata 2025-mi ukiakkut piffissamik aningaasanillu atulussinnaaffiunngitsumik Qaqortumiit Qaqortumullu angalasinnaalernissarput qilanaaraarput, Stine Egede oqarpoq nangillunilu.
-Mittarfimmut aqquserngup inaarsarneqarnissaanik Isumaqatigiissutip imaqarnera tusarluarnaqaaq, kommunimmi aningaasaqarnera eqqarsaatigalugu oqiliallaataaqimmat. Taamaalilluta aningaasat allanut, ilaatigut inissialiortiternermut, atorsinnaanngussavavut. Neriuutigaarputtaaq mittarfiup illutasssaanik suliariumannittussarsiorneq sanaartornerlu najukkatsinni suliffeqarfinnik atuinermik nassataqassasoq tamannami inuussutissarsiortut kommunillu iluaqutigissammassuk.