ISG nutaamik pisortassarsiussaaq

Innovation South Greenland A/S, Kommune Kujalleq Inuussutissarsiutinik Ineriartortitseqatigiiffik nutaamik pisortassarsiussaaq.
Allan Chemnitz aggustimi 2019-imiilli pisortaasimasoq allamik suliffittaarnissaa pissutaalluni juulip qaamataata naalernerani ISG-mi suliunnaassaaq.

Borgmesteri Stine Egede ima oqarpoq: ”Allanip unittussanngornera uggoraara, taamaattorli nutaanik pissanganartunik ujarlerniarnera akuersaarlugu. Allan tamanik ajunnginnerpaanik kissaappara, suliffittaavanilu siunissami Innovation Greenlandimi pisortatut suleqatigilluarnissaa neriuutigalugu. Kommunitsinni inuussutissarsiutitigut periarfissat Allanip ilisimaarilluarpai, Innovation Greenlandillu kujataani inuussutissarsiutitigut ineriartortitsinissami periarfissanik ilisimaarinnittoqarnera kommunitsinnut iluaqutassaaq.

Siulersuisut siulittaasuat Steffen Lynge ima oqarpoq: ”Allanimik suleqateqarluarsimanerput qujassutissaqarfigaara, taassumammi ISG-p aallartisarnera peqataaffigisimammagu, taamaaliornermigut Kommune Kujallermi nutaaliornernik inuussutissarsiutinillu inerisaanermut tunngasunik qulequtsiisarsimammat. Inuttaa ilaqutaalu siunissami ajunnginnerpaanik kissaappakka".

ISG-mi pisortassatut atorfik ulluni qaninnerni inuttassarsiorneqassaaq.