Asfalti 125 tonsinik oqimaasuseqartoq kissarnerani atorluarumallugu Qaqortumi aqquserngit ilaat asfaltersorneqarput.
- Umiarsuaq asfaltimik assartuisoq Nanortallip tungaanut aallaraluarluni motooriminik akornuteqalerluni Qaqortumut utiinartariaqalerpoq. Asfaltillu atorluarumallugit kissarnerini Qaqortumi Kimmernani aamma Majavejimi atuinnarneqarput, Teknikkimut avataangisinullu ingerlatsinermi pisortaq Pâlo O. Kúitse oqarpoq.
Nanortalimmi asfalterinissamut pilersaarutit umiarsuup ajoquteqalerneranik kinguaattoortinneqaraluartut, aqquserngit asfalterneqartussat allannguuteqanngillat.
- Nanortalimmi aqquserngit asfaltertussat qaqugu suliarineqarnissaat umiarsuaq iluarseriarpat paasinarsiumaarpoq, qaquguusinnaanera oqaatigisinnaanngikkallarpara, Pâlo O. Kúitse oqarpoq.