Ukiup taamaalinerani imaatigut Narsarsualiassagaanni aqqutaasoq Tunulliarfik sikuartarpoq, taamaalineranilu Targat ajornartorsiortinneqaleraangata angallat isumaannaatsoq attartorneqarluni angallassissutigineqalertarpoq.
-Sikualernerani Targat ajornartorsiorput, angallallu isumannaatsoq attartorneqaraluartoq kigaatsunnguunera peqqutigalugu Narsarsuarmut angalaniartut ullaaralaakkut sisamanut aallartinneqarsinnaasarput, Stine Egede nassuiaavoq nangillunilu.
-Tamanna angalasunut akisunaarneqarsinnaasarpoq, assersuutigiinnarlugumi ullumikkut angallammut attartukkamut kigaatsunnguamut ilaasut inuit 12-it Narsarsuamiit timmisartussaminnut inortuipput, taamaalillutillu angallavissaminnut ingerlaqqinnissartik annaallugu, Stine Egede oqarpoq.
Angallannikkut atugassarititaasut qanoq inissisimaneri ilisimaneqareertillugit angallassinissamut isumaqatigiissuteqartut akunnerminni oqaloqatigiinnerusariaqartut borgmesteri isumaqarpoq.
-Piffissami matumani sikuarnera ilisimaneqareermat angallassisut akunnerminni oqaloqatigiissimannginnerat tupigusuutigaara, kujataanilu ukiuunerani angallassineq taamaattoq akuerineqarsinnaanngimmat angallassinissamut isumaqatigiissuteqartut oqaloqatigiinnerunikkut akisussaaffimmik tigusinissaannik iluungaarlunga kissaateqarfigaakka, taamalillunimi angallanneq ataqatigiinnerusoq pilissammat, Stine Egede oqarpoq.