Asasakka kommune kujallermi innuttaasut, innuttaaqativullu nunatsinni aammalu nunarsuarmi sumi tamani ittusi!
Ukioq qaangiuttoq kommune Kujallermi allannguineq annertooq alloriarfigineqarpoq, sulineq pitsanngorsartuarneqassaaq inerisarneqartuassallunilu.
Illoqarfittatsinni nunaqarfittatsinnilu najugaqarutta sullinneqarluarnissarput pingaaruteqarpoq, tamanna tunngavigalugu nunaqarfittatsinni sullissivinni sulisut siullermeerlutik pikkorissarneqarput, pikkorissaanerlu malitseqaqqikkumaarpoq.
Ukiormanna sillimaniarneq eqqarsaatigalugu nunaqarfittavut tamarmik qaammataasat aqqutigalugit oqarasuaatinik pilersorniarpavut.
Kommune meeqqanut eqeersimaartoq
Kommune Kujallermi meerartatta meeqqerivinni atuarfimmilu ineriartortinneqarnissaannut periarfissaqarluarnissaat kommunalbestyrelsip pingaartitaraa.
Meeqqerivittatsinni aqutsisut siusinaartumik pilertortumillu iliuuseqarnissamik pikkorissarneqarnerat meeqqerivinni meeqqat ineriartorfissaannut eqqummaarinnerulernermik malitseqassaaq, matumani meeqqap atualinnginnerani iliuuseqartalernissaq siunertarineqarpoq.
Meeqqerivinni atuarfinnilu periussissianik nutaamik suliaqarluta ulapputeqaleruttorpugut, matumani borgmesteritut tulluusimaarutigaara angajoqqaat peqataatillugit kommunitsinni periusissiornermik suliaqaratta. Taamaattoq angajoqqaat suli amerlanerusut suliani taamaattumi peqataasarnissaat kaammattuugerusuppara.
Qularinngilara angajoqqaajusugut tamatta meerartatta pitsaasumik avatangiiseqarnissaannik pingaartitsisartugut, taamaakkaluartorli angajoqqaaqateqarpugut ikiorneqarnissamik pisariaqartitsisunik. Pisariaqartitsinerlu annertummat, meeqqallu angerlarsimaffiup avataanut inissinneqartartut suli amerlammata, ukiumi qaangiuttumi inuuniutigalugu paarsisartunik atorfinititsivugut.
Ilaqutariit ataatsimut pilersaarusiorluakkamik ikiorneqartarnissaat nukittorsaaviginiarlugu Ilaqutariinnut sullissivik aamma Meeqqanut inuusuttunullu sullissisut, allaffeqatigiilerlutik ataatsimoortinneqalerput.
Aamma ulluni akissarsiffiusuni illoqarfittatsinni tamani meeqqanik inuusuttunillu nakkutiginninnerit aallartipput, pisariaqartitsisunullu unnuisarfiusinnaasunik pilersitsisoqarpoq. Matumani meeqqat inuusutullu pisariaqartitsisut ikiorneqartarput, malitsigisaanillu angajoqqaat ilanngullugit aqqutissiuussinissamik suleqatiserinninneq aallartinneqarluni.
Kujataani inuusuttut pinerlunniartarnerat iliuuseqarfiginiarlugu Kalaallit Nunaanni politiit suleqatigalugit sulinerup aallartittup iluatsilluarnissaa neriutigaara.
Kommunittami ilaqutariinnut innuttaasunullu tamanut toqqissisimaffiulluni najugaqarfiunissaa kommunalbestyrelsimiit pingaartitaraarput, qulaanilu taariikkakka aallaavigalugit kukkussanngilanga annertuumik meerartagut pillugit suliniuteqarluta oqaruma.
Innuttaasut kommunimi suleqataasut
Oqaatigisariaqarparali suliniuteqarneq kommunip kisimiilluni kivissinnaanngimmagu, innuttaasullu akisussaaqataallutik suleqataanissaat pisariaqarluinnarmat.
Matumani nammineq kajumissutsiminnik suliaqartorpassuit, peqatigiiffilerisut, timersoqatigiiffinni sungiusaasut, angajoqqaallu nuannersumik avatangiiseqartitsillutik pinaveersaartitseqataasut qamanngavik qutsavigingaarpakka. Sulilluarnissigummi tunniusimalluarnissigullu annertoorujussuarmik kommunitsinnut tunissuteqartarpusi, aalanerulernermullu aqqutissiuusillusi.
Inuussutissarsiutit ineriartortitsinerlu
Kommunitsinni ineriartortitseqqinnissamut inuusutissarsiutit nutaat pinngitsoorsinnaanngilagut, pisariaqartippagullu.
Kommunitsinni inuusutissarsiutinik ingerlataqartut qanimut suleqatigalugit, mittarfissap atuutilernermini sunniutissai eqqarsaatigalugit, suleqatigiisitamik inerisaaleruttorpugut, matumani kommunitsinni ataqatigiissaarluakkamik pilersaarusiornissaq siunertaralugu.
Kalaallit Nunaata kujataa periarfissat nunaattut ilisaritissalugu tulluartuuvoq. Maanimi savat, nersutit, kukkukuut, naatitat assigiinngitsut, immami uumasut, aatsitassarsiorfiit, sumiiffiillu nunarsuarmi kinngornussassat allattorsimaffianni ilaalersimasut pisuussutigaagut.
Piujuaannartitsinissaq eqqarsaatigalugu tunisassiornerit assigiinngitsut ilaatigut savanik toqoraanermi savat iloqutai siusinnerusukkut eqqaannarneqartartut maanna kommunitsinni namminersortunit qimmit nerisassaattut tunisassiarineqartalertussanngornerat nuannaruutissaasoq.
Suliffeqarfiit taamaattut nutaaliornermikkut ineriartortitseqataasut kommunitsinniit tapersersugaraagut, tikilluaqqungaarlugillu.
Aalisarnermik ineriartortitseqqinnissaq siunertaralugu Naalakkersuisut suleqatigiissitamik pilersitsinerat nuannaarutigaara. Neriuutigaara susassaqartut peqataaffigilluarlugu aammalu piviusorsiortumik inerititalimmillu sulineq illugiilluni ingerlanneqarumaartoq. Nunatta kujataa aamma imartalissuummat periarfissat atorluarneqanngitsut amerlassasut kialuunniit takusinnaassavaa. Ullumikkut tunitsivinni qerititsivissaaleqititsineq kipiluttunartorsiutaavoq. Coronap kingunerani suaat toqqortaatigineqartut annertuneri pissutigalugu tigooraasinnaasimannginneq neriuutigilluinnarpara ukioq manna aporfiussangittoq.
Aatsitassarsiorfiit
Aatsitassasiorfiit eqqarsaatigalugit suliffeqarfiit sullissisussat suliassaqaleriartorneri malunnarpoq. Ukiumimi qaangiuttumi kommunitsinni aatsitassarsiorfissani marluusuni piareersarnerni sulisut 40-t sinnillit sulisinneqarput.
Inuussutissarsiuteqartut inerisaaqqikkusuttut aamma inuussutissarsiutinik nutaanik aallartitserusuttut periarfissaq una atorlugu suliffeqarfiutitsinnik ISG-mik atorluaanissaannik kaammattorusuppakka.
Takornariaqarneq
Martsip naalernerani Narsarsuup Københavnillu akornanni toqqaannartumik aqqutit ammarneqariarpata periarfissaq takornarialerisortatsinnut neriuppunga iluaqutaallualerumaartoq.
Takornariat timmisartukkut tikittartut savaateqarfinnut illoqarfittatsinnullu unnuiartortartut kujataani aningaasatigut isaatitsissutigisarpagut.
Umiarsuarnilli takornariartaatinik tikittartut kommunitsinnut iluaqutaasumik ineriartuutaasumillu isaatitsissutaalissappata takornariat piffimmut tikiffigisaminnut akiliisussanngortinneqartariaqarput, tamannalu suliniutigileruttorparput.
Siunissami takornarialerineq eqqarsaatigalugu aqquserngit ineriartortillugit piorsaanissaq siunertaavoq, tamanna aallarnisaavigalugu Qajiitanut aqquserniornissamut aallarnisaatitut aningaasaliissuteqarnikuuvugut, tamatumalu saniatigut Naalakkersuisut suleqatigalugit Narsarsuarmiit ikaartarfiliinissaq suliniutigivarput.
Kommunimiit savaatillit nersutaatillit nunaatillillu atugaat pillugit suleqataarusoqigatta savaatillit siunnersorteqarfiat peqatigalugu qanimut suleqatigiillualernissaq isumalluarfigaara.
Ukrainimi sorsunnerup kingunerisaanik nerukkaatissat naggorissaatillu akitsorujussuarput, tamanna uumasuutilinnut ilungersunartumik kinguneqarpoq. Silaannaap allanngoriartornera nunarsuarmi malugineqartoq maani aamma misigillualerparput ilaatigut savaateqarfinni aqquserngit aserorluinnarsimapput. Ukiarmi siornatigut misigisimanngisatsinnik sialussuarujussuarpoq. Tamatuma kingunerisaanik aqquserngit annertoorujussuarmik kuugunneqarput. Maanna Naalakkersuinikkut akuliuttoqarnissaanik ilungersuuteqarnerput qujanartumik tusaaneqalerpoq. Siunnersorteqarfik savaatillillu peqatigalugu pilersaarusiorneq ingerlanneqarpoq.
Ukiumi qaangiuttumi savaateqarfimmik matusussaagaluamik matusinnginnissamut suleqataasimagatta nuannaarutigaara. Savaaqqat toqoraaviliartartut ikiliartunnginnissaanut suleqataaffigisinnaasatsinni suleqataasassaagut.
Inuussutissarsiut nunatta kujataani ukiorpassuarni ilaqutariippassuarni ingerlanneqarsimasup atajuarnissaa kommuunitut suleqataaffigerusoqaarput.
Eqqagassalerineq
Kommunitsinni pinngortitamik kusanarnerpaamik avatangiiseqarpugut, tamattalu ikioqatigiilluta avatangiiserput kusanartoq maanngaannaq eqqaafiginagu paarilluassavarput.
Siunissami eqqagassat immikkoortereersimasut assartortarnissaat, aamma nunaqarfinniit angujartussavarput. Ukioq manna innuttaasut peqatigalugit sulinerup ingerlaqqinnissaa pissaaq.
Ineqarneq
Kommunitsinni innuttaasut tamarmik angerlarsimaffeqarnissaat kommunalbestyrelsimi pingaartipparput.
Matumanilu illoqarfinni tamani angerlarsimaffeqanngitsunut unnuisarfeqalernissaq ilungersuutigaarput.
INI A/S aqqutigalugu inissianik attartornermut aningaasaliissutinik pissarsiat INI A/S-mut utertinneqartalissasut Kommunalbestyrelsimiit aaliangiussimavarput, matumani inissianik aserfallatsaaliinermut nutarterinissamullu aningaasat atorneqartussanngorlugit.
Nanortalimmi ukiorpassuarni amigaatigineqarsimasoq errorsisarfik piviusunngortussanngorpoq. Tamanna assorsuaq nuannaarutigaara.
Kommuni innuttaasunut malinnaatitsisoq
Ataatsimiititaliat sulinerminni innuttaasunut malinnaatitsinerunissaat innuttaasunillu qanimut naapitsillutik periarfissaqarnerunissaat siunertaralugu kommunalbestyrelsip ataatsimiittarneri marluk taamaallaat katersuuffiusassasut aaliungiupparput, sinnerilu atortorissaarutit atorlugit ataatsimiinnikkut ingerlanneqartalissasut; aningaasat ataatimiititaliat angalanerunissaanut atorneqartalissapput.
Missingersuut 2023
Ukioq mannamut missingersuut kommunalbestyrelsip tamarmiusup akuersissutigisaa 15,8 mio. korunininik sinneqartoorfiusussatut missingersuutigineqarpoq.
Utoqqartagut inuiaqatigiinnillu sullissisut
Utoqqartagut ukiorpassuarni sulereersimasut atugassarissaarnissaat tamatta kissaatigaarput; utoqqaat ilaqarput suli inuiaqatigiinnut tunniussassaqartunik, taakkulu piumassusaat misilittagarpassuilu atorluartariaqarpagut.
Manna periarfissaq atorlugu utoqqartatsinnut isumassuisut qamanngavik qutsavigingaarpakka.
Nunaqqatigut ilinniarnertik, suliffitsik imaluunniit napparsimanertik peqqutigalugu ilaquttatik nunartillu qimallugu inissisimasariaqartut eqqaamavakka. Taamaakkaluartorli nalliuttut pilluarnartuanik misigisaqarsimassasusi neriuutigaara. Ukioq manna aamma ilaqarpugut siullermeerlutik asasaminnik amigaateqarlutik ukiumut nutaamut appakaattunik. Tamassi qanortoq siunissami nukissanik tunineqarisi.
Ukiumut qaangiuttumut tamassinnut qujarusuppunga. Suliffimmi sumiluunniit suliguit, inoqatinnut ikiuuttaruit, meerartatsinnut utoqqartatsinnut piginnaanikittortatsinnulluunniit isumassuisaruit qamanngavik qujaffigerusuppakkit.
Kommunalbestyrelsemi suleqatikka tamassinnut qujanaq.
Asasakka tamannguassi, nunarsuarmi sumiikkaluarussi, tamatta ukiumi matumani angusaqarluarnissatsinnik, peqqinnermillu kissaalusi ukiortaami pilluaritsi.
Qujanaq!