Qaqortup Timersortarfiani timigissartarfiup allilerneqarneranut sanaartorneq novembarimi naammassimmat timigissartarfik nutaaq innuttaasunit atorluarneqarluni aallartippoq.
-Timigissartarfiup allilerneqarnera naammassimmat atorluarneqarnerulernera malunnaqaaq, inuit siornatigut takusarsimanngisagut aamma atuilernikuupput. Tamanna qujanaqaaq, timigissartarfiummi allilerneqarnerani silaannarinnerulerpoq isersimaffigiuminarnerulerlunilu, taamaattumik aningaasaliillutik tapiissuteqartut, tassa Kommune Kujalleq aamma Lokale- og Anlægs Fonden tapiissuteqarnerannut qutsavigingaarpagut, Timersortarfiup pisortaa Kent Kielsen oqarpoq.
Qaqortup Timersortarfiata timigissartarfianik alliliinissammut Kommune Kujalleq 250.000 koruuninik tapiissuteqarpoq, timigissartarfimmillu innuttaasut atuilluarnerat Kommune Kujallermiit nuannaarutigineqarpoq.
-Timersorneq Kommune Kujallermiit tapersersugaraarput, taamaattumik timigissartarfiup allilerneqarnissaanut aningaasaleeqataasinnaanerput nuannaarutigaarput. Nuannaarutigaarpullu timigissartarfiup allilerneqarnerata kingorna timigissartarfimmik atuisut amerleriariarsimanerat, Kommune Kujallermi kulturimi sunngiffimmilu suliassaqarfimmi pisortaq, Freddy Christensen oqarpoq.
Qaqortup Timersortarfiani timigissartarfiup ulloq unnuarlu ammasalernissaa maanna Timersortarfimmiit suliniutigineqaleruttorpoq.