Kommune Kujallermiit eqqagassat 879 tonsit missat Esanimiit aaneqarput

Eqqagassat ikuallassinnaasut poorsuarnut qaqortunut poortorneqarsimasut Narsamut Nanortalimmut Qaqortumullu ESANI-p assartuutitut umiarsuaanit aqqusaartorneqarneranni saviminikut Qaqortumi aamma ilanngullugit katersorneqarput.

-Eqqagassat ikuallassinnaasut aamma saviminikut katillugit 879 tonsit missaani oqimaassuseqartut M/S North Vikingimik katersorneqarlutik kujataaniit Europamut assartorneqarput. Umiarsuaq assartuutaasoq aallernermi kingullermi Nanortalimmut apississinnaasimanngilaq, taamaattumillu matumani aallernermi eqqagassat ikuallassinnaasut aaneqartut annertungaatsiarput, Kommune Kujallermi Teknikkimut avatangiisinullu Ingerlarsitsivimmi avatangiisilerisoq, Ole Lennert Poulsen nassuiaavoq.

Qaqortumiit eqqagassat ikuallassinnasut 500 tonsit missaat saviminikullu 120 tonsit missaanittut,  Narsamut umiarsuup aallernissaata nalaani atortutigut ajutooqqaneq pissutigalugu eqqagassat ikuallassinnaasut Narsamiit taamaallaat 35,5 tonsit, kiisalu Nanoortalimmiit eqqagassat ikuallassinnaasut 224 tonsit missaaniittut kujataaniit assartuunneqarput.