Isumaginninnermi Ingerlatsivik toqqaannartumik nunaqarfinnut kiffaartuussilerpoq

Kommune Kujallermi nunaqarfinni innuttaasut Isumaginnittoqarfimmi inunnik sullissisunit isiginnaarut oqarasuaalluunniit atorlugu kiffartuunneqarsinnaanngorput.
Ataasinngorneq, Sisamanngorneq aamma tallimanngorneq nal. 13.00-miit 14.00-p tungaanut nunaqarfinni innuttaasut illu sullissiviit aqqutigalugit inunnik sullissisunik oqaloqateqarsinnaanerat maanna periarfissaalerpoq.

-Nuannaarutigaara maanna nunaqarfinni innuttaasut isiginnaarut oqarasuaalluunniit atorlugu toqqaannartumik inunnik sullisisunik sullinneqarsinnaanngornerat, taamatut periarfissaqartitsilerneq atorluarneqarumaartoq neriuppunga, Kommune Kujallermi Isumaginninnermut Pinaveersaartitsinermullu Ingerlatsiviup pisortaa Nielsine Petersen oqarpoq.

Nunaqarfiit aqqaniliusut illoqarfikkaartumik inunnik sullisisoqassapput:
Igaliku, Qassiarsuk aamma Narsarsuaq Narsaminngaanniit sullinneqassaaq.
Eqalugaarsuit, Saarloq, Qassimiut aamma Alluitsup - Paa Qaqortuminngaanniit sullinneqassaaq, kiisalu
Ammassivik, Tasiusaq, Appilattoq aamma Narsarmijit Nanortalimminngaanniit sullinneqassallutik.