Qaqortumi ilaqutariinnik sullissivik ulluunerani attavigineqartassaaq oqarasuaatikkut 64 54 20-ikkut, matoqqanerulluni nalaani isumaginninnermi pigaartoq oqarasuasat 49 34 35 atorlugu attavigineqartassalluni.
Narsami ilaqutariit illuat Kommune Kujalliup oqarasuaataa 381518 atorlugu saaffigineqartassaaq, Narsamilu isumaginninnermi pigaartoq 49 72 03 atorlugu attavigineqartassalluni.
Nanortalimmi qimarnguimmik ammaanissaq pilersaarutigineqarpoq.
Narsami Qaqortumilu qimarnguinni ilaqutariinnut siunnersortitut atorfiit massakkut inuttassarsiorneqarput, Nanortalimmilu assinganik pilersaaruteqartoqarportaaq. Ilaqutariinnut siunnersorti ilaqutariit qimarnguimmik atuisut qanoq ikiorneqaqqinnissaannik naliliisartussaavoq.
Aallaqqaammut arnat qitornallit kisimik qimarnguinnik atuisinnaassapput. Neqeroorut annertusineqarumaarnersoq isummerfigineqarumaarpoq.
Qimarnguiit ilaqutariinnik sullissivinniit tiguneqarnissaannik kommunalbestyrelsi 19. juni 2023 ataatsimiinnermini aalajangiisuuvoq. Qimarnguinni imminnut pigisuusuni taamani aqutsisuusunut piumasaqaatit naammassineqartarsimannginnerat Kommunip qimarnguinnik tigusinissaanut tunngavilersuutaasimavoq.