Allattoq: Borgmester Stine Egede Kommune Kujalleq
Kommune Kujallermi kommuninilu allani eqqagassalerineq oqallittarfinni eqqartorneqangaatsiartarpoq. Tamanna tunngavigalugu ESANI-p pilersinneqarnerani suna siunertaanersoq eqqagassalerinermilu suut pilersaarutaanersut matumuuna naatsumik oqaluttuarineqassapput.
Esani, tassaavoq Nunatta Eqqagassalerinermut Ingerlatseqatigiiffigaa kommuninit sisamanit pigineqartoq: Piginnittut tassaapput Avannaata Kommunia, Qeqqata Kommunia, Kommune Qeqertalik aammalu Kommuneqarfik Sermersooq. Eqqagassalerinermi ingerlatseqatigiiffimmik pilersitsinissaq 2018-imi kommunalbestyrelsimit tamarmiusumit aalajangerneqarpoq. Avannaata Kommunia qanittukkut ESANI-mut isumaqatigiissuteqarpoq ukiortaamiit eqqagassanik aallertalernissaq passussisalernissarlu pillugit.
Qaqortumi ikuallaavik 1999-imi atulerpoq. Siorna matuneqarnissaata tungaanut atuunnerani ukiuni kingullerni qasseerpassuarni aningaasat millionerpaaluit iluarsaassinermut atorneqartarsimapput. Eqqagassanik ikuallaasarnermut avatangiisitigut peqqissutsikkullu piumasaqaatit sukaterneqarsimapput Qaqortumilu ikuallaavik nutaaq 287 mio. kr. -inik akeqartussatut missingerneqarsimavoq. Maanna ukiut tallimat qaangiunneranni akia suli qaffariaqqissimanissaa naatsorsuutigisariaqarpoq, kommunilu ullumikkut taama amerlatigisunik aningaasaateqanngilaq.
Naatsorsuinertigut paasineqarsinnaavoq eqqakkanik Nuummut assartuisarneq akilersinnaanerusoq. Nuummi ikuallaaviup 2024-imi februarimi naammassinissaata tungaanut eqqagassat Danmarkimut assartorneqartarput. Sisimiuni ikuallaavik aamma maanna sananeqarpoq. Ikuallaavik taanna piariissaaq 2025-ip aallartinnerani .
Ukiuni aggersuni saliinissaq Kommune Kujallermi ilungersuupparput, aamma savaateqarfiit eqqaanni. Suleriaaseq ineriartortissavarput suleriaaserlu attanneqarsinnaasoq qularnaassallutigu. ESANI-p umiarsuaa aappaagumiit nunaqarfinnut tamanut ornigussinnaalissaaq eqqagassanillu aallertassalluni, tassa eqqagassanik nalinginnaasumik kiisalu saviminikunik.
Nunaqarfinni utaqqiisaasumik ikuallaasoqartarnissaanik qinnuteqaat massakkorpiaq aaqqissorneqarpoq. Eqqakkat poortuussat uumasunit aserorneqartarnerat ilisimaneqarmat eqqagarpassuillu ukiukkut teqqartarmata pisariaqartitsineq naapertorlugu eqqagassanik ikuallaasinnaanissaq pisariaqarpoq.
Pissutsit massakkut atuuttut ataavartussaanngimmata innuttaasut naammagittarnissaannik paasinninnissaannillu qinnuigaavut.