airplanebooksbriefcase business cogs cross election entertainment fish house law lockmedicalpeopleselfservices socialtax

Nakuusaaqqani ilaasortat sapaassuarmi oqalugiaataat

Asasagut ilaquttagut, ikinngutigut nunaqqatigullu tamassi sapaassuarmi pilluaritsi

Juulleriartulerpoq, tussiutit erinarsuutillu juullerpalaartut kialaammik tunisisut radiukkut appisimaartalerput. Angerlarsimaffinni illoqarfimmilu qulleeqqat qaammaqqutaalluartut ikititersimapput, juullimut assut qilanaartuutaallutik.

Juulleriartornerani naneruut kisitsisitalik ikittalerparput, nigaliliap naneruutaa siulleq ikippoq. Ammartakkat ammarnissai pilerinartuaannartut juullip tungaanut ullunik kisitsissutigalugit qilanaartuutigaagut.

Apummi sisorarnerit meeraqatit ilaquttallu ilagalugit sammisassaqarneq ukiukkut nuannequtaalluinnartarpoq, qannerujussuarnillu qannileraanngat aneerluareerluni qiialaarsimalluni angerlamut iserluni oqorsaatigut masakujuttut, panertunik taarsersimallugit nissimaap mamarisaanik suaasat qaqortunik nerisassaqarluni tipaatsunnartaqaaq.

Juulliliarlutik ilaquttat tikittut juullip ilisarnaataasa ilaatigut ilagaat, ilaquttat sivisuumik takusimanagit juullisioqatigisussanngorlugit pilluarnartaqaaq.
Juulliaqqap ullaavani radio juullisiutinik appisimaartoq, orpiliaq pinningaaluni ikumasoq, iterfigalugu naliitsuusarpoq. Nalunagu orpiliartussaalluni, poortukkanik ammaasussaalluni, ullullu ingerlanerani ilaqutseralunilu nerilluartaartussaalluni.

Juullikkut nalaani angajoqqaatta sulinnginnerini, sila nuannersillugu tasersuarmut ilaqutariilluni pisuttuarluni nuannertaqaaq aammalu angerlarluni pinnguaatinik pinnguarluni, juullisunnittunik tamululluni, ila nuannertaqaaq.

Asasagut angajoqqaagut, ilaquttagut, ilinniartitsisugut, oqartussallu periarfissaq manna atorluarlugu naatsumik apuussilaarusuppugut.
Sunngiffimmi sammisaqarnikkut ikinngutigiinneq, ataatsimoorneq peqatigiinnerillu pinerani piginnaasagut ineriartulersarput. Taamaammaat angerlarsimaffimmi, atuarfimmi avataaniluuniit sammisaqaqatigisigut, peqatigisigullu.

Asasavut meeraqativut ulluinnarni immitsinnut paareqatigiilluta pisarta. Kamassaarineq ilatsinnut sakkortuumik kingunerlussinnaasarpoq, nalusarparpummi ilavut sunik atugaqarnersut.

Tamassi juullisiorluarnissassinnik ukiumullu nutaamut iserluarnissassinnik kissaallusi sapaassuarmi pilluaqqigitsi.


3. december 2023