airplanebooksbriefcase business cogs cross election entertainment fish house law lockmedicalpeopleselfservices socialtax

Nanortalimmi isumalluarneq

Borgmester Stine Egede sapaatit akunnerisa 48-ianni Nanortalimmiippoq, taqqavaniinerminilu kommunip sulisuinik, suliffeqarfinnik, utoqqarnik inuusuttunillu naapitsisarpoq, taakkulu kommunalbestyrelsillu suliassaanik oqaluttuuttarpai kiisalu innuttaasut oqaatigiumasaannik tusartinneqartarluni.
Nanortalimmi utoqqaat, utoqqaat ornittagaannik kommunip atugassanngortitaanik atuineq eqqarsaatigalugu suleqatigiilluarput. Oqaatigiumasaalli inuttut saaffiginninnermi ulluinnarnilu suliassat eqqarsaatigalugit pitsaanerusumik sullinneqarumanermut tunngasuupput, soorlu MitID-ip E-boksilu atorneqalernerisa kingorna pisortanut akiliiniartarneq eqqarsaatigalugu.

Takornariartitsinerup suli ineriartorteqqinneqarnissaanut kiisalu sanaartugassanut, tassa paaqqinnittarfiliortoqarnissaanut inissialiortoqarnissaanullu suliffeqarfiit isumalluarput. Inissiat eqqarsaatigalugit ukiortaami kommunip allaffia kiisalu inissiaqarfik B992 piareeriarpata sulisunut inissiat kiisalu attartortittakkat nalinginnaasut atoriaannaat amerlanerulissapput. Kommunimi sanaartugassatut pilersaarutit eqqarsaatigalugit sulisunut inissiat tallimat pilersaarutigineqarput kiisalu Namminersorlutik Oqartussat inuusuttunut inissialiaat sisamat sananeqassallutik. Tamakku tamarmik ukiortaami ukiunilu aggersuni inissaqarniarnermut iluaqutaassapput.

Errorsisarfik ukiup ataatsip matuma siorna atorneqalersoq atorluarneqaqaaq. Aqqusinermi itersarpassuit isornartorsiorneqarput, taakkulu teknikkeqarfimmiit piaarnerpaamik pitsanngorsarneqassapput. Takornarianik sullissineq eqqarsaatigalugu pingaartumik perusuersartarfeqarneq umiarsualiveqarnerlu assut sammineqarput. Sanaartugassat kiisalu Nalunami kiisalu Amitsumi aqerluusarsiorfiup piareeersarneqarnera pillugu borgmesterip suliffeqarfinnut inuusuttunullu oqariartuutaa tassaavoq kikkut tamarmik atorfissaqartinneqarmata, kiisalu kajumissaarutigaa ineriartorneq ilinniarnikkut suliffimmillu sungiusarfissaqarnikkut atorluaqqullugu kiisalu suliffeqalernissaq imminullu pilersorsinnaaneq eqqarsaatigalugu atorluaqqullugit.

”Klubbimi inuusuttut qassiit sanasunngorusunneri kiisalu nivissap ataatsip innaallagisserisumut ilinniarusunnera tusarlugit assut nuannerpoq. Inuusuttut ilinniareeraangamik Nanortalimmut utertarnissat assorsuaq neriuutigaara, tassami Nanortallip inuusuttut peqatigalugit ineriartornissaa pisariaqarteqaarput” Stine Egede oqarpoq.

Kommunimi sulisut kommunip allaffiani - ukiumi ataatsimi nutarterneqarsimasumi - ataatsimooqqilernissaminnut qilanaarput.

Stine Egede oqarpoq: ”Sulisut allaffimmi ataatsimuuleriarpata suleqatigiinneq pisariilleqqissaaq, imaanngilarli ingerlatsiviit assiginngitsut akornanni suleqatigiinnerup aaqqissugaaneranik sukaterisoqarnissaa sumiginnassagipput. Aporfippassuaqarpoq ulluinnarni suliarisartakkatsinnik. Taamaammat isumallualeriartorneq sapaatit akunnerata ingerlanerani naapittakkatsinni tamani malugisartagara tusarlugu nuanneqaaq."

11. december 2023