airplanebooksbriefcase business cogs cross election entertainment fish house law lockmedicalpeopleselfservices socialtax

Borgmester Stine Egede sapaassuarmi oqalugiarpoq

Asasakka Kommune Kujallermi innuttaasut tamassi, sapaassuarmi qamannga pisumik pilluaritsi.

Ulluvut qaangilertortaqaagut, juullip qaammataa qilanaarisartagarput aallartippoq. Niivertarfinni pisiassat juullerpaluttut takussaalereerput, sulisullu ulapputilereeqisut malunnartarpoq. Niivertut sullilluartaratsigut qujaffigerusuppassi.

Aalisartugut, piniartortavut, savaatillit tuttuutillillu qujanaq juullisiutissatsinnik pilersorluartaratsigut, mamartunik peqqinnartunillu pissaqartittarpatsigut.
Oqaluffitsinni sulisut tamassi, juullip qaamataani ulappuffigisartagarsi pilersarpoq. Qujanaq eqqissinartumik tipaatsunnartumillu misinissatsinnut periarfissaqartikkatsigut, naak nunaqarfittatsinni amerlasuuni oqaluffinnguit juullikkunni allaat ikumassaarnikuusut.

Suliffeqarfinni allani tamani sulisuususi allat sulinnginnerini sulisusartusi ilissittaaq qujaffigiumavassi.
Inersimasunut oqaatigerusuppara juulli eqqaamagisigu meeqqat juullerimmassuk. Inersimasunngorunik ileqqut ingerlateqqittussaavaat, qanortoq meeqqasi paarilluarlugit nuannersunik misigitittarisigit.

Meerannguit ukiormanna inunngorsimasut juulli siullerpaammik misigisussaagaat ilaqarpugut asangaakkatsinnik qimagussimasunik eqqaammannittunik.
Juulli neriuummik kissalaartumik qanortoq tunisigili asanninnerullu pilluarnartuata nukinnik qanortoq tamatta misigitikkisigut.
Ilavut kajumissutsimik suliaqartartut juulleriartornerani pisariaqartitsisunut assigiinngitsutigut ikiuuttartut qamanngavik qujaffigaasi.

Meeqqap nipaa juullip pigaa taammaammat juulli meerartatsinnut pigitillugu meerartatta oqaaseqarnissaat pingaartissimavara, Nakuusaaqqakkut oqaaseqareerpata Inuusuttuaqqat aamma nipilersorfigissavaatigut. Tamannguassi juullisiorluarnissassinnik kissaallusi advendt sapaataasa siullianni, sapaassuarmi pilluaqqikkitsi.

Qujanaq.


3. december 2023