airplanebooksbriefcase business cogs cross election entertainment fish house law lockmedicalpeopleselfservices socialtax

Eqqakkanik ikuallajasunik Nuummut assartuineq siulleq

Eqqakkat ikuallajasut kujataaniit Nuummut assartuunneqartussat siulliit Esanip umiarsuaanit katersorneqaleruttorput.

Ulluni makkunani ESANI SHIPPING eqqagassanik ikuallajasunik aallerluni kujataaniippoq. Naatsorsuutigineqarpoq poorsuit 500-nik ikinnerunngitsut Nuummi ikuallaavimmi ikuallanneqartussat kujataanniit Nuummukaanneqarnissaat.

-Kujataani illoqarfinninngaanniit poorsuit 500-t missaanniittut arsartuunneqassapput, taamatullu eqqagassanik kujataanut aallerfigitittarnissaq qaammatit tamaasa pisartussatut pilersaarutaavoq, Kommune Kujallermi Teknikkimut avatangiisinullu ingerlatsivimmi Avatangiisilerisoq, Ole Lennerth Poulsen oqarpoq.

Kommune Kujallermi nunaqarfinnit aqqaniliusunit eqqagassat illoqarfinnut qaqugukkut assartuunneqartalernissaat aamma pilersaarusiorneqarpoq.

-Nunaqarfinni eqqakkanik ikuallaasarneq atorneqarunnaarluni poorsuarnut poortuisalernerup kingorna eqqakkat illoqarfinnut qaqugukkut assartuunneqartalernissaat aamma maanna pilersaarusiorneqaleruttorpoq, umiarsuullu tullissaani maanngarnissaannut poorsuit nunaqarfittatsinneersut prammimik aaneqartussat aamma ilaanissaat qulakkeernialeruttorparput, Ole Lennert Poulsen oqarpoq.

22. januar 2024