airplanebooksbriefcase business cogs cross election entertainment fish house law lockmedicalpeopleselfservices socialtax

Angajoqqaarsiat ilisimasanik nutaanik immersorneqartut

Kommune Kujallermi angajoqqaarsiat ilisimasassanik nutaanik saqqummiivigineqartalerlutillu sapaatip akunneranut marloriarlutik siunnersorneqarnissamik pisariaqartitsigunik saaffiginnissinnaalerput.

Angajoqqaarsiatut meeqqamik paarsilluni ilaatigut perorsaaqataaneq nalorninarsinnasarpoq. Tamannalu pillugu Kommune Kujallermi angajoqqaarsianut siunnersortit angajoqqaarsiaasunut ilisimasassanik nutaanik qaammammut ataasiarlutik saqqummiussisalissapput.

- Qaqortumi angajoqqaarsianut aliasuuteqarneq annaasaqarnerlu pillugit saqqummiusseqqammerpugut, tamanna angajoqqaarsiaasunit tigulluarneqarpoq. Qaammatikkaartumik angajoqqaarsiaasunut ilisimasassaannik atorluarsinnaasaanniillu qulequtalerluta saqqummiisassaagut, matumanilu sammisat misigissutitsigut qaffakaatinneqarsinnasut annertuut sammineqanngippata Narsami Nanortalimmilu angajoqqaarsiaasut attaveqaatitigut peqataasinnaasassapput, Kommune Kujallermi angajoqqaarsianut siunnersorti Nauja Ottosen Knudsen nassuiaavoq, nangillunilu.

-Aliasuuteqarneq annaasaqarnerlu pillugit Qaqortumi saqqummiussinitsinni sammisaq misigissutitsigut mianernartuummat onlinekkut peqataatitsinngilagut, upernaamulli Narsamut Nanortalimmullu angalanissatsinni iluatsillugu saqqummiukkumaarparput, Nauja Ottosen Knudsen oqarpoq.

Angajoqqaarsiat saqqummiivigineqartalernissap saniatugut arlaatigut nalornissuteqartoqarnerani siunnersorneqarnissamik pisariaqartitsisut sapaatip akuneranut marloriarlutik, tassa ataasinngornermi sisamanngornermilunniit saaffiginnissinnaalerput

- Massakkut angajoqqaarsialerisut marlunngorneranni iluarpoq aaqqissuussinerit assigiinngitsut ataavaartumik ingerlasussat ukiumut pilersaarusiorsinnaangorsimagatsigit. Pingaartipparput angajoqqaarsiaasartut sakkussaminnik immaqaluunniit nalorninermi, imaajarneqarnissamilluunniit pisariaqartitsinermi saaffiginninnissaat, siunnersortissinnaanissaallu. Ataavartumik ingerlasussamik ataasinngornikkut sisamanngornikkulluunniit oqarasuaatikkut ornigunnikkulluunniit saaffiginnissinnaalerneq periarfissiissutigaarput, neriulluta atorluarneqassasoq. Kommune Kujallermi Meeqqanut ilaqutariinnullu suliassaqarfimmi pisortaq, Ivalu Lund Hammeken oqarpoq.

13. februar 2024