airplanebooksbriefcase business cogs cross election entertainment fish house law lockmedicalpeopleselfservices socialtax

Igalaaminernut qillertuusanullu eqqaaviit atorluarneqarput

Qaqortumi igalaaminernut qillertuusanullu eqqaaviit 2023-mi 2,4 tonsit sinnerlugit igitsiviusimapput.

Ukioq 2023-ip ingerlanerani igalaamernit 1551 kg aamma qillertuusat 896 kg iginneqarsimasut nalunaarsorneqarsimapput.

-Ukioq kingulleq igalaamernit qillertuusallu katillugit 2.447 kiilut eqqaavinni katersorneqarsimasutut nalunaarsorneqarsimasut oqaatigisinnaavara, matumanili erseqqissaatigissavara kisitsit tamakkiisuunngimmat. Qillertuusanummi igalaaminernullu eqqaaviit imaarneqaraangata ilaanni uuttuinngitsoortoqartarpoq, Kommune Kujallemi Qaqortumi eqqakkanik tigooraavimmi aqutsisoq, Finn Alfred Olesen oqarpoq.

Ukioq nutaaq aallarnerfigalugu imeruersaatit ilaatigut qillertuusanik igalaaminernillu puullit ilaat niuertarfinnut utertinneqarsinnaanngornerat eqqaavinnut iginneqartartunik ikileriartitsissagaluartoq, eqqaaviit peqqissaartumik atorluarneqarnissaat kaammattuutaavoq.

-Qillertuusat igalaamernillu utertinneqarsinnaanngitsut qillertuusanut igalaaminernullu eqqaaviit atorluarlugit iginneqartarnissaat kaammattuutiginarpoq, taamatullu eqqaaviit sumiiffinni assigiinngitsuni uninngasuutitagut atorfissaannut taamaallaat atorneqartarnissaat kaammattuutigerusuppara. Taamaalillunimi maani eqqakkanik tigooraavimmi piffissaq immikkoortiterinerujussuarmut atortagarput suliassanut allanut atorluarsinnaassagatsigu, Finn Alfred Olesen innuttaasunut kaammattuivoq.

15. februar 2024