airplanebooksbriefcase business cogs cross election entertainment fish house law lockmedicalpeopleselfservices socialtax

Qaqortumi kalaalimineerniarfik sivisunerusumik ammasalerpoq

Qaqortumi Kalaalimineerniarfiup sivisunerusumik ammasarlernera inuit soraarfiisa nalaani pisinniartoqarsinnaanngorneranik periarfissiivoq.

Ataasinngornermiit tallimanngornermut Qaqortumi Kalaalimineerniarfik arfineq pingasuniit sisamanngulerneranut ammasarsimasoq maanna tallimat tungaanut ammasalerpoq.

-Kalaalimineerniarfik inuit amerlanerpaartaasa suliffimminniit soraarneranni matoreersimasaraluartoq maanna tallimat tungaanut ammasalerpoq, taamatut allannguinermi inuit soraarfiup nalaani Kalaalimineerniarfimmut pisinniarnissaminnut periarfissaqalerput, Kommune Kujallermi Avatangiisinut Ingerlatsivimmi ingerlatsinermut pisortaq, Pâlo O. Kûitse nassuiaavoq.

Ulluni makkunani kalaalimineerniarfimmut pisiniaraanni aningaasanik taamaallaat akiliisoqarsinnaavoq, kortimilli akiliisinnaanngornissaq sulissutigineqarpoq.

-Ulluni makkunani kalaalimineerniarfimmut pisiniassagaanni aningaasanik taamaallat akiliisoqarsinnaavoq, qarasaasiatigulli atortulersorneq inisseriarpat kortimik akiliisoqarsinnaanngussaaq, tamanna sulissutigineqarpoq, Pâlo O. Kûitse oqarpoq.

Kalaalimineerniarfimmi sunik nioqquteqartoqarnersoq oqarasuaatikkut 64 44 33-mut sianerluni paasiniaasoqarsinnaavoq.

22. februar 2024