airplanebooksbriefcase business cogs cross election entertainment fish house law lockmedicalpeopleselfservices socialtax

Kommune Kujallermi upalungaarsimanermut nersornaat 2023

Kommune Kujallermi upalungaarsimanermut nersornaatip siulliusup tunniunneqarnerani Sermeq Helicopterimiit Pilu Nielsen nersornaaserneqarpoq.

Tallimanngornermi februaarip aappaanni Kommune Kujallermi upalungaarsimanermut nersornaatip siullerpaajusup tunniunneqarnerani Sermeq Helicopterimiit Pilu Nielsen nersornaaserneqarpoq.

Nersornaaserneqarneranut 2023-mi Qaqortumi Tasersuup avannaatungaani ikuallattoqarnerani aamma Qaqortumi eqqaavissuup ikuallarujussuarnerani suleqataalluarsimanera tunngavilersuutaavoq.

-Ikuallattoqarnerani pisuni marluusuni Pilup suleqataalluarnermigut kommunitsinni qatserisartut sulineranni periutsimik nutaarluinnarmik misilittagaqalersippai. Matumanilu suleqataanermini qatserisartut ikuallattumut qamisaanerannut piffissarujussuarmik atuiffissaraluat pinngitsoortippaa, kommunimut aningaasarpassuarnik sipaarfiusumik, borgmester Stine Egede oqarpoq.

Aasaq pinngortitami ikuallattoqalernerani nunap panernerani anoraasuaneranilu ikuallanneq sukkasuumik siaruaassimavoq, taamaalineranilu Sermeq Helicopters qatserisartunit suleqatiserineqarsimavoq, suleqatigiinnermillu iluatsilluartumik kinguneqarluarluni. Pisup kingorna Qaqortumi eqqaavimmi ikuallattoqalermat suleqatigiilluarnermi misilittakkat atorlugit Sermeq Helicopters qamisaanermi suleqataaqqippoq.

-Taamaattumik upalungaarsimanermut ataatsimiisitaliap siunnersuuteqarneratigut Pilu Nielsenip nersornaaserneqarnera inissaminiilluinnarpoq, Kommunilu sinnerlugu sulilluarnermigut ikiuulluarsimaneranut qamanngavik pilluaqqullugu qutsavigerusuppara, Stine Egede oqarpoq.

Kommune Kujallermi upalungaarsimanermut nersornaat siullermeerluni tunniunneqartoq, 2025-mi tunniunneqaqqissinnaavoq.

2. februar 2024