airplanebooksbriefcase business cogs cross election entertainment fish house law lockmedicalpeopleselfservices socialtax

Utoqqaat attaveqaatinik atuisinnaanissaannik isumaqatigiinneq

Kommune Kujalliup aamma utoqqaat pillugit oqaaseqartartup isumaqatigiissuteqarnerisigut, Kommune Kujallermi utoqqaat aamma utoqqaat pillugit oqaaseqartartoq isiginnaarutitigut attaveqqaatit atorlugit attaveqatigiissinnaanngorput.

Utoqqaat pillugit oqaaseqartartup utoqqaallu ataatsimeeqatigiittarnissaannut Kommune Kujalleq ininik aammalu isiginnaarutitigut ataatsimiissutinik periarfissiissuteqartassaaq, paarlattuanillu utoqqaat pillugit oqaaseqartartoq ataatsimiinnissanik pilersaarusiortartuullunilu ataatsimiinnerit inernerinik Kommmune Kujallermut ilisimatitsissuteqartassaaq.

- Utoqqaat mobilitik nutaaliaasut atorlugit MitID-mut, e-boks-imut allanullu attaveqarsinnaalernissaannut periarfissiiniarluta utoqqaat Nanortalimmi, Narsami aamma Qaqortumi naapittarfiini internetilersuinissamik suliniut kommunitsinni misissorlugu aallarteqqammerparput. Taamaammat utoqqaat pillugit oqaaseqartartup Kommune Kujallermi utoqqartatsinnik attaveqartalernissaanut isumaqatigiissuteqarnerput tulluartuuvoq, borgmesteri Stine Egede oqarpoq.

Isumaqatigiissuteqartoqarneratigut kommune Kujalleq, utoqqarnut oqaaseqartartup kommuninut kaammattuuteqarnerani siulersaalluni taama periarfissaqartitsilerpoq.

- Nunarput angalaffigissallugu isorartoorujussuullunilu akisoorujuussuusinnaavoq, taamaammat Kommune Kujallermik suleqateqarnikkut utoqqaallu immitsinnut ungasikkaluarluta kiinnerluta attaveqarsinnaalernerput nuannaarutigeqaara. Attaveqatigiinneq siulleq Nanortalimmi, Narsami Qaqortumilu utoqqarnit peqataaffigineqartussaq februaarip tallimaani pissaaq. Siunertaavorlu isiginnaarutit atorlugit utoqqarnik attaveqartarnerup kommuninut allanut aamma siaruaannissaa, utoqqaat pillugit oqaaseqartartoq Kiista P. Isaksen unnersiorpoq.

Ataatsimeeqatigiinnerit nalunaaquttap akunnerini marlussunni sivisussuseqartartussat aallaqqaammut upernaakkut ataasiarluni ukiakkullu ataasiarluni pisassapput.    
2. februar 2024