airplanebooksbriefcase business cogs cross election entertainment fish house law lockmedicalpeopleselfservices socialtax

Ikuallattoqarnerani kalerriiniarluni toortakkat ikilineqarput

Kommune Kujallermi illoqarfinni tamani ikuallattoqarneranik kalerriiniarluni toortakkat ilaat atorunnaarlutik matoorneqarput.

Ikuallattoqarneranik kalerriiniarluni toortakkat inuit oqarasuaatinik angallattakkanik atugaqanngikkallarnerannili piusimapput, ullumikkullu inuit ikuallattoqartillugu kalleriiniarnerminni 113 atorlugu sianertarmata toortakkat ilaat matuneqarlutik atorunnaarsinneqarput.

-Ikuallattoqarnerani kalerrisaariniarluni toortakkat ikilineqarput, inuillu katersuuffiini soorlu sissiukkani, utoqqaat illuisa atuarfiillu eqqaanni assigisaanilu pisariaqartutut nalilikkatsinni toortakkat atatiinnarneqarput. Ikuallattoqarnerani kalerriiniarluni toortakkat ilaat atorneqanngisaannarsimapput, amerlasuullu asuli toorneqarlutik aserorneqartarmata taama iliuuseqarpugut, Kommune Kujallermi upalungaarsimanermut pisortaq, Asmus Hansen oqarpoq.

Ikuallattoqarnerani kalerriiniarluni toortaakkat ilaasa atorunnaarnissaat pillugu tusarniaasoqarsimavoq, innuttaasunik qisuariarfigineqanngitsimik.

-Kalerrisaarutit ilaasa atorunnaarneqarnissaat pillugu innuttaasunut tusarniaasoqarmat ataasiinnarmilluunniit qisuariartoqarnikuunngilaq, tamanna aamma tupaallannanngilaq. Ullutsinnimi ikuallattoqarnerani kalerriiniarnermi inuit 113 atulernikuaat, tassungalu sianerneq akeqanngilaq, Asmus Hansen oqarpoq.

Nanortalimmi Narsami aamma Qaqortumi kalerrisaarutit toortakkat atorunnaartut saviminernik qallerlugit matuneqarput.

26. marts 2024