airplanebooksbriefcase business cogs cross election entertainment fish house law lockmedicalpeopleselfservices socialtax

Borgmesteri Stine Egede: Kujataani angallanneq pillugu qanoq pilersaaruteqartoqarpa?

Sikorsuit aammaarlutik kujataani imaatigut angallannermik unititsineranni, Diskolinep Air Greenlandillu akornanni suleqatigiinnginneq pillugu borgmesteri naammagisimaarinnikkunnaarluni allakkanik ammasunik allagaqarpoq.

Allattoq, Borgmesteri Stine Egede:

Kommune Kujallermi ukiut tamangajaasa sikorsuit takkuttartut aammaarlutik angallannermik unittoortitsineranni kujataani angallaneq pillugu qanoq pilersaaruteqartoqarpa?

Maanna sikorsuit kingumut takkunneranni imaatigut angallassinerit tamarmik uninngapput, taamaalineranilu angalatitsiviit ataqatigiinngereersut qanoq suleqatigiinngitsiginerat kingumut erserpoq.

Ullunimi makkunani imaatigut angallassinerit unittooqqanerini Narsarsuarmi inuit angalasut katersuuttaqattaarput, ilaallu ullorparujussuarni sumiiffigisaminniit ingerlaqqinnissaminnut utaqqisariaqartarput.

Peqqinnissaqarfimmiit angalaniartut ilaatigut ulluni tallimani sivisunerusumilluunniit utaqqisinneqaqattaarput, meeqqat timersoriat unammiarfissaminnut apuutinngitsoorput, ullorparujussuarniluunniit angerlamut apuunniarsarineqarput, nunaqarfittatsinniit angalaniat aamma peqqinnissaqarfinnut angalasussat ullut 14-it tikilllugit ingerlariaqqinnissaminut utaqqisinneqaqattaartut akueriinnarneqarsinnaanngillat.

Maanna poorski qanillivoq, timersortartorpassuillu poorskikkuni angalasussat kujataani pissutsit massakkutut inissisimaneranni unammisaqattaarnernut apuussinnaanissaat qularnarpoq.

Kiffartuussinissamut isumaqatigiissut kujataanut atuuttoq eqqarsaatigalugu Diskoline Air Greenlandilu akunnerminni suleqatigiinnerusariaqarput, aamma nunaqarfittatsinni angalaniartut eqqarsaatigalugit.

Diskolineminngaanniit angalanianut sullissineq sumiginnaaneroqqissanngippat piaartumik allatut aaqqissuussisoqartariaqarpoq. Immakkut angallasisinnaannginnermi qanoq pilersaaruteqartoqarpa?

Ukiut tamangajaasa sikorsuit takkuttarput, tamatigullu angallassinikkut ajalusoortitsisarput. Piffissami matumani siunissamilu sikorsuit takkuffiini eqaannerusumik aaqqiissuteqartoqarnissaanut pilersaaruteqartoqartariaqarmat qanoq pilersaaruteqatoqarnera saqqummiunneqartariaqarpoq.

Kujataanimi sikorsuaqarfiusartumi angalaniarneq eqaannerusumik aaqqissuunneqartariaqavippoq.

Naalakkersuisut iluunngarlunga qinnuigaassi susassaqartut peqatigalugit iliuuseqaqqullusi. Sikorsuit ukiut siuliinut naleqqiullugit annertupput, sulilu annertunerit uiaattussaapput. Qaammaterpassuarni angallanneq ulluni kingullerni atugarput allanngornani ingerlanneqassappat kujataamiunut assut kingunerluttussaavoq, minnerunngitsumik peqqinnissaqarfimmut sulisunut - sullitaannullu - assut ulapereersunut annertuumik sunniuteqartussaavoq.

11. marts 2024