airplanebooksbriefcase business cogs cross election entertainment fish house law lockmedicalpeopleselfservices socialtax

Innovation South Greenland nutaamik pisortartaarpoq

Innovation South Greenlandip siulersuisuisa Miki Jensen 36-nik ukiulik, Tusagassiutilerinermik Ersittunillu Kulturilernermik bacheloreqartoq ISG-mi pisortassatut toqqarpaat.

Miki politikkikkut, kulturikkut, pisortani ingerlatsinermi nittarsaassinermilu suliassaqarfinni ilisimasaqarluarpoq, tamatumuunakkullu Kalaallit Nunaanni attaveqarnissamut suleqatinullu paasinnilluarnissamut piginnaassuseqalersimavoq.

Miki Folketingimi Inatsisartunilu politikkikkut suliaqarfiit assigiinngitsut misilittagaqarfigai, suliniutit nutaaliat aqutsisuuffigisimallugit kingullertullu Air Greenlandimi Branding Account Manageritut sulisimalluni, tassanilu nunatsinni avammullu nittarsaassineq, niuernikkut suleqatit ussassaarinerillu akisussaaffigisimallugit.

”Kujataani peroriartorsimanera kujataanullu asanninnera tunngavigalugit Innovation South Greenlandimi sullissinissamik periarfissinneqarninnik erinisuppunga. Aammattaaq ilisimasama piumassutsimalu ajunngitsumik ineriartortitsinissamut atornissai kiisalu kujataani akimut peqatigiinnikkut suleqatigiinnissamut tapersiinissannut qilanaarlunga. Suleqatit, kujataani inuiaqatigiit inuussutissarsiortullu peqatigalugit kujataata siunissaa ineriartornermik isumassarsiorfiunissaalu ataatsimoorluta tunniusimallutalu peqataaffigissavarput," Miki Jensen oqarpoq.

ISG-p siulersuisuisa siulittaasuat Steffen Lund oqarpoq: ”Mikip pisortanngorneratigut suliffimmik kajumissuseqalersitsiviusumik anguniagaqartoq, suleqateqarnermik pingaartitsisoq, nutaaliullaqqissoq aaqqiissutissanillu ujartuisartoq pisortartaaraarput. Mikip Qaqortumi inunngorlunilu peroriartornera aamma iluaquterujussuuvoq, maanna  isummat isiginnittaaserlu nutaat kujataanut iluaqutaasussat nassarlugit angerlartussanngorpoq".

ISG-mi pisortatut atorfik Kirsten Ørgaardip nammineq aalajangikkamik qimammagu atorfik siorna inuttaaruppoq.

Miki atorfittaamini 2024-mi maajip aallaqqaataani aallartissaaq.

20. marts 2024