airplanebooksbriefcase business cogs cross election entertainment fish house law lockmedicalpeopleselfservices socialtax

Ajarsivasimmi najugaqartut tusarnaartinneqarput

Qaqortumi utoqqaat angerlarsimaffianni Ajarsivasimmi najugaqartut Josef Lund Josefseniminngaanniit poorskerpaluttunik tusarnaartinneqarput.

Pingasunngorneq marsip arfernanni angutip erinagilluinnartup erinaa tusarnersoq Ajarsivasimmi najugaqartunit tusarnaagassaavoq. Aaqqissuussaq tamanna Kommune Kujallermit aaqqissuussaavoq.

-Kommuni Kujallermiit pingaartipparput tusarnaartitsisoqassatillugu innuttaasut tamarmik assigiimmik periarfissinnissaat, taamaattumik utoqqartagut imaaliallaannaq nikeriaannanngitsut periarfissinniarlugit Josef Lund Josefsenip maaniinnera iluatsillugu tusarnaartinneqarnissaat pingaartissimavarput, Inerisaanermik ingerlatsivimmi sunngiffimmut kultureqarnermullu immikkoortortami pisortaq, Kim Larsen oqarpoq.

Utoqqaat angerlarsimaffianni Ajarsivasimmi taama aaqqissuisoqarnera najugaqartunit tigulluarnerqartoq, tusarnaartitsisumit qujamasuutigineqarpoq.

-Qujamasunnarpoq utoqqaat taamatut periarfissinneqarnerat, uangalu nuannaarutigeqaara utoqqarnut poorskisiutinik tusarnaartitsinissannut periarfissinneqarnera, Josef Lund Josefsen oqarpoq.

Josef Lund Josefsen Narsami tusarnaartitsereersoq, Qaqortumi innuttaasunut tamanut ammasumik marsip arfernani nal. 20.00 oqaluffimmi tusarnaartitsereeruni, Nanortalimmi marsip arfineq-aappanni nal. 19.00 atuarfiup aulaani tusarnaartitsinissaa pilersaarutaavoq.

6. marts 2024