airplanebooksbriefcase business cogs cross election entertainment fish house law lockmedicalpeopleselfservices socialtax

Lars Lundblad pillugu eqqaaniut

Angut nunatsinni kujataanilumi suliniuteqarnermigut sunniuteqarluarsimasoq 74-inik ukioqarluni toqukkut qimaguppoq.

Lars Lundbladip apriilip pingajuanni 1949-mi Aasianni inunngorsimasup, marsip tallimaanni 2024 toqukkut qimagunnerani nunatsinni timersornerup silarsuaani aamma politikkikkut sunniuteqarluarsimasumik annaasaqarpugut.

Lars Lundblad ilinniartitsisutut ilinniarsimasoq, Qaqortumut nuunnermi kingorna Qaqortup Timersortarfiani pisortaasimavoq, ukiorpaalussuarnilu Qaqortumi Sulisartut Højskolianni pisortatut sulisimanermi saniatigut Kommune Kujallermi aamma politikkikkut sulisimavoq, ilaatigut Qaqortumi Siumup immikkoortortaqarfiani siulittaasuusarsimalluni.

Larsip ilisarnaataasa ilagaat angusaqarusuttuunini avatangiisiminillu ineriartortitserusussuseqartuunini. Taamaattuunini suliffigisarsimasamini, politikkikkut sulinermini, timersornerullu silarsuaani angusarissaartitserusuttarnermigut ersersittuartarpaa.

Isikkamik arsarnermi sungiusaasuusarnermini ilaatigut sungiusakkaminik arfinileriarluni nunatsinni pissartanngortitsisimavoq, nunarpullu sinnerlugu nunanut allanut unammisartunut aamma sungiusaasuusimanermi saniatigut KAK-mi (Kalaallit Arsaattartut Kattuffiani) siulittaasuusarsimavoq.

Lars nunatsinni ivigaasaaqqanik arsaattarfeqalernissamut suliniuteqarluarsimasut ilagaat, nunatsinnilu ivigaasaaqqanik arsaattarfiit siullersaat Qaqortumiittoq ilaatigut suleqataalluarnermigut pilersitseqataaffigisimavaa.

Timersoqatigiiffiit kattuffianni siunnersortitut sulisarsimanermini aamma KAK-mi siulittaasuunermini sineriammi angalasarnermini ilisarisimannitserpassuaqarpoq, qimagunneranilu inussiarnersuunera ukiunilu kingullerni qimmini ilagalugu angalajuartarnera nunaqqataasugut maqaasissavarput.

Laasip toqukkut qimagunnerani qimagaasut, nulia, qitornai, ernutai, qatanngutai ikinngutaalu misiginneqatigingaarpakka.

Lars Lundbladip – Laasip eqqaaneqarnera ataqqinartuuli.

Kommune Kujalleq sinnerlugu,

Stine Egede, borgmesteri.

8. marts 2024