airplanebooksbriefcase business cogs cross election entertainment fish house law lockmedicalpeopleselfservices socialtax

Bronzemik angerlaassisut borgmesterimit pilluaqquneqarput

QAA-mi aamma K-1933-mi assammik arsartartut niviarsiarartaat akuleriillutik Ilulissani pissartanngorniutereerlutik bronzemik angerlaassinerat borgmesterimit nuannaarutigineqartoq ataatsimoorfiuvoq.

Qaqortumi Assammik Arsartartut (QAA) aamma K-1933-mi akuleriillutik U-16-it pissartanngorniunneranni holdini tallimaasuni unammisaqattaarnerminni bronzennapput, tamannalu malunnartinniarlugu ujaminnassimasut sisamanngornermi marsip 14-ianni Qaqortumi kommunip ataatsimiittarfianut borgmesterimit qaaqquneqarput.

-Assammik arsartartut Ilulissani pissartanngorniunnerminni angusarissaarnerat tulluusimaarnarmat ataatsimooqatigalugit malunnartitsinissarput qilanaarisimavara, nuanneqaarlu pilluaqqullugit naapilaarneri. Timersuummik nuannarisaminnik siunissami aallussiinnarnissaannik angusarissaarluartarnissaannillu kissaappakka, angajoqqaallu tapersersuijuarnerannut qutsavigalugit, borgmesteri Stine Egede oqarpoq.

Niviarsiaqqat Ilulissani unammisaqattaarnermi bronzennattut ujaminnannertik kajumissaatigilluaraat sungiusaasuata maluginiarpaa.

-Ujaminnannissarput siunertaralugu unammiartoratta, anguniakkatsinnik piviusunngortitsinerput nuanneqaaq. Meeqqat ujaminnattut unammiartornitsinniit suli tikinnata sungiusariaqqinnissartik qilanaarilereerpaat. Ujaminnannertik kajumissuseqarnerulernermik angusaqaqqikkusunnermillu pissarsiffigigaat malugianiarpara, QAA-mi sungiusaasoq Preben Møller oqarpoq.

Bronzennattut ilaat Lula Bola Knudsen Jørgensen K-1933-meersoq ukiup holdianut ilanngutsinneqarportaaq.

14. marts 2024