Takornariaqarneq pillugu ilinniartut 26-t allagartartaartut

Adventure Guidet 22-t aamma Takornariatitsinermi serviceøkonominngortut sisamat marlunngornermi decemberip 13-ianni Qaqortumi allagartartaarput.

image

 

Adventure Guidenngortut aamma Takornariartitsinermi service√łkonominngortut Qaanaamiit Nanortalik tikillugu aggerfeqartut allagartartaarneranni, Kommune Kujallermi borgmesteri Stine Egede oqalugiartunut ilaavoq.

- Angusarsi pillugu ullumi katersuunnermi immissinnut tulluusimaarutiginissassinnut pissutissaqarluarpusi, anguniagaqarnissinnimmi pingaartitsillusi tunniussimanersi ullumi imminut akilertutullusooq takussutissillugu timitalerparsi, Stine Egede oqalugiarluni pilluaqqusinermini ilaatigut taama oqarpoq.

Allagartartaarlutik ullorsiortut siunissami takornarialerinerup silarsuaani sulilluarnissaannik oqaaseqarfigineqarput.

-Nunarsuarmi allani, nunatsinnilumi misilittakkat ilaatigut isumassarsiorfigigutsigit siunissami inuussutissarsiut una angisoorujussuanngorsinnaavoq. Ilattalu inuussutissarsiutigilluarsinnaalissavaat pimoorullugu sapiissuseqarluni ingerlakkaanni, naak ilaatigut nakkarfissat aqqusaarneqarsinnaasassagaluartut, uniffigiinnarnagit ingerlaniinnaraanni, Stine Egede oqarpoq nangillunilu.

-Ilinniakkassinnit sakkut pigilikkasi atorluarumaarpasi, ajunngitsunik tamanik kissaassillunga tamassi, angerlamut ingerlasussat ingerlalluarisi, tamassilu ilaquttasi peqatigalugit nalliuttut atorluarisigit aammalu ukiumut nutaamut iserluarisi.

Udgivet d. 13. december 2022