Sapaatip akunnerata 19-iat naggaserlugu Isumaginninnermut Pinaveersaartitsinermullu ataatsimiitialiaq aamma atorfilittat Narsamiinnerminni isumasioqatigiipput, tamannali pitinnagu utoqqarnik aamma innarluutilinnik tallimanngornermi maajip qulinganni naapeqateqarput.
-Utoqqaat aamma innarluutillit pillugit ataatsimiititaliap politikkikkut anguniagai naapeqateqarnermi saqqummiunneqarput. Utoqqaat naapeqatigineqarneranni utoqqaat siunnersuisoqatigiiannik pilersitsinissamut ilaatigut nassuiaasoqarpoq, kingornalu aamma innarluutilinnik naapeqateqarnermi aamma innarluutillit siunnersoqatigiiannik pilersitsinissaq pillugu nassuiaasoqarluni, Ingerlatsivimmi pisortaq Nielsine Petersen nassuiaavoq.
Tallimanngorneq utoqqarnik innarluutilinnillu naapeqateqarfioreersoq arfinngorneq sapaallu isumasioqatigiiffiuvoq.
-Isumasioqatiginnermi ilaatigut utoqqaat pillugit eqqartueqatigiippugut, aamma puigortunngorneq pillugu saqqummiisoqarpoq. Eqqartukkat pissanganartut saniatigut kommunip iluani aaqqissuusseqqinnermi killiffik aamma aaqqissuusseqqinnissamut siunnersuut, politikikullu anguniakkat killifii sammivagut kiisalu ukioq 2025-mut missingersuutip siullermeerneqannginnerani eqqartueqatigiilluta, Nielsine Petersen oqarpoq.
Kommuni Kujallermi 2025-mut missingersuut maajip 21-anni siullermeerneqassaaq.