Kommune massakkut 25 mio. koruuninik akiliutigeriagaannagassatut atugaqarpoq. Tamanna Kujallermi Illuutit A/S atorunnaarsinneqarmat 2022-mi pivoq, ilaatigut Qummumi sulisut inissaat akilerneqarnissaat pillugu. Taanna ilutigalugu kommunip akiitsuinik ukiumut 8-9 mio. koruuninik aningaasanit tigoriaannaasunit akilerneqartartoq kommunip akiliutigeriaannagassatut atugaanut ilungersunartorsiortitsivoq.
Aningaasaqarnermut Ataatsimiititaliaq apriilimi ilisimatinneqarpoq Namminersorlutik Oqartussanut akileraarutinut A-nut qaammatini pingasuni akilersuisoqarsimanngitsoq. Tamanna 40 mio. koruunit missaannik naleqarpoq. Ernianut aningaasartuutit akisoqisut pinaveersaarniarlugit kommunalbestyrelsip aningaaserivimmi akiliutigeriaannagassatut atukkani amerliniarpai, imaluunniit aningaaserivimmi taarsigassarsilluni.
Kommunip Namminersorlutik Oqartussanut akileraarutinik A-nik akiitsoqarnera siorna ukiallulli paasineqarmat, aningaasaqarnermut ingerlatsivimmiit aningaasaqarnermut ataatsimiititaliamut ilisimatitsisimanngineq isornartorsiorneqarpoq, ataatsimiititaliaq ingerlaannartumik taama annertutigisumik pisoqartillugu ingerlaannaq ilisimatinneqartartussaammat. Aningaasaqarnermut ingerlatsivik qanoq taama kukkusoqaqqinnginnissaanik saqqummiivoq kommunalbestyrelsilu siunissami naatsorsuutiginngisamik paasitinneqaqqinnginnissamik isumalluarpoq.
Soorunami kommune aningaasanik tigoriaannaateqarsimagaluarpat missingersuutillu malinneqarsimagaluarpata akileraartutitigut akiitsut akilernissai ajornartorsiutaasimanavianngikkaluarpoq. 2023/2024-mut atuivallaarneq aningaasanik tigoriaannaat tatineqarnerannut pissutaasut maanna ingerlatsivinni naatsorsuutit nalunaarsorneqarsimasut akiliutigineqarsimasullu misissuiffigalugit ingerlataqaleruttorput.
Kommunalbestyrelse ippassaq paasitinneqarpoq kukkusumik nalunaarsuisimanerit amerlasut, misissuinissamut piffissaliussat naligiissaarinerillu amigartut kiisalu maajip 13-ianni paasineqartoq 2024-mut missingersuutit 8 mio. koruuninik sippuivigineqarsimasut. Aqutsisut 2024-mut iluarseeqqinnissamut pilersaarusiornissamik eqqartueqatigiipput, 2024-mut missingersuutit attatiinnarneqarniassammata. Nuannaarutissaavortaaq piffissami qanittumi aningaasaqarnermi sulisut ilinniartinneqassammata.
Aningaasaqarnermut pisortaq kontunut nalunaarsuinernut pilersaarutissaq ilisaritippaa, neriorsuillunilu 2024-p affaanut naatsorsuutit aggustip aallartinnerani saqqummiunneqarsinnaalissasoq, tassanilu pisoq pillugu nalilersuisoqaqqissalluni.
Stine Egede oqarpoq: "Aningaasaqarnermut ataatsimiititaliap akiliutigeriaannagassatut atukkanik amerlinissaq pillugu aalajangigaa kommunalbestyrelsimit akuerineqarnera nuannaarutigeqaara. Aningaasaqarnermut Naalakkersuisoqarfik saaffigaarput, alloriarfissallu tullia tassaassaaq akiliutigeriaannagassanik atugassanut imaluunniit aningaaserivimmut taarsigassarsinermut Naalakkersuisunit akuerineqarnissaq, tamatumunngali ernianut sipaarniarnissamut suna akilersinnaassanersoq apeqqutaassaaq.
Iluatsillugu innuttaasunut ersarissarusuppara pisoq pimoorullugu suliarigatsigu, akiligassagut akilertaratsigit, aningaasatigut sukannersumik ingerlatsinerput nangillugu ingerlatissagatsigu kiisalu aningaasaqarnikkut nakkutilliinerput pitsanngorsarneqarmat. Akiliutigeriaannagassatut atukkat kommunip innuttaasunut pisussaaffianut sunniuteqarnavianngilaq".