Asasara Aalisarnermut Piniarnermullu Naalakkersuisoq, Kim Kielsen,
Ukiuni kingullermi, pingaartumik 2024-mi Nunatta Kujataani Nannut assut amerlisimanerat malunniukkiartorpoq. Amerlisimangaarmata nannut arnavissat suli ukioqalersimanngitsunik piaqqisarlutik inoqarfinnut annguttarnerat nalinginnaaleriartorpoq.
Uumasut suulluunniit anginerit, pingaartumik nannut, piaqqerillutik ulorianarluinnarsinnaasarput, tamakkulu naammattooriasaaraani ajorluinnartumik pisoqariaanaavoq.
Nannut amerlisimanertik pissutigalugu kaallutik inoqarfinnut qunujunnaarlutik appakaatalernikuupput. Tamatuma saniatigut maani kommunitsinni savaateqarfinnut apuuttartut amerliartuinnarput. Tamannalu ukioq manna marlussoriarluni inunnut ajorluinnartumik kinguneqangajassimavoq nalaatsornerinnakkut pinngitsoortinneqarsimasimasumik.
Inuit aarlerillutik nunamut angalaniarunnaarput, tuperiarnissaq ornigineqarunnaarpoq, aasaaneranimi inuit ilaat tuperlutik aalisakkanik panertiteralutik ukiussamut eqqanaarsartarput. Tamakkulu pisinnaajunnaarpata inuiaqatigiit inuusaasiannut pissaqarniarneranullu annaasaq imaannaanngitsuussaaq. Pilisarnerup piujuarnissaa illersortariaqarpoq.
Aalisartut, piniartut savaatillillu taakkuupput nannunik naamattuuigajunnerpaat. Taakkulu oqariartuuteqarput nannut amerlisimaqisut, allaat inuussutissarsiutaannut ajoqutaalersimasumik. Kipparsimaffinni inuit soqutiginagit pilianik tilligartalersimapput, savaateqarfinnilu savat eqqissisimatinneqarunnaarsimallutik.
Pissutsit erloqinartut qaangerneqassappata maani Kommune Kujallermi ukiumut nannuttassat sisamaanaasut ikippallaarujussuaqaat. Pingaartumik nunaqarfiit kujallerpaat piniarnerinnangajammik inuussuteqartunut suli amerlanerusunik nannuttassinneqarnissaat pisariaqarluinnalerpoq.
Nannut uiaraangamik Aappilattoq, Narsaarmijit eqqaallu aqqusaartarpaat, taqqavanilu pisarineqartarnermikkut kujataata sinneranut appakaatussat ikilisimaartissinnaallutik.
Taamaammat Naalakkersuisunut matumuuna ilungersorlunga kaammattuutigissavara Kommune Kujallermi nannut minnerpaamik qulit ukiumut pisassiissutigineqartalissasut.
Inussiarnersumik inuulluaqqusillunga,
Stine Egede, borgmesteri.